Bakıda tramvay xətlərinin çəkilməsi üçün yanaşı hansı addımlar atılmalıdır? - Ekspert SADALADI

Ötən günlərdə rəqəmsal inkişaf və nəqliyyat nazirinin müavini Rəhman Hümmətov Bakıda tramvay xətlərinin çəkilməsi ilə bağlı açıqlama verib.  “Bizim metro və ya dəmir yolu imkanımızın olmadığı yerlərdə, məsələn, Mehdiabad istiqamətindən Azadlıq prospekti boyu, Binəqədidən keçməklə “28 May” istiqamətində tramvay xəttinin çəkilməsi effekt verə bilər. İkinci belə istiqamətlərdən biri, son dövrlərdə əsas cazibə mərkəzlərindən birinə çevrilən “Seebreze” zonasıdır. Hansı ki, əsasən bu bölgədə yenidən salınan bir bölgə kimi tramvay xəttinin inşası effektiv ola bilər.Bu istiqamətlərdə də araşdırmalarımız davam edir”, - nazir müavini qeyd edib.  

Maraqlıdır, tramvay xətlərinin çəkilməsinin hansı müsbət tərəfləri ola bilər?  

Bununla bağlı Sfera.az-a açıqlama verən nəqliyyat məsələləri üzrə ekspert Aslan Əsədov deyib ki, tramvay xətlərinin çəkilməsi təqdirəlayiq hadisədir:

“Amma burada bir məsələ var – şəhər infrastrukturu buna imkan verəcəkmki? Yəni bu mümkün olduğu təqdirdə, müəyyən addımlar atmaq olar. Məsələn, hər hansı bir ərazidən yenidənqurma, söküntü işlərinin aparılması, yolun genişləndirilməsi, istiqamətin ayrılması hesabına olacaqsa, burada sərnişinlərin kütləvi axınını təyin edəcək addımların atılması məmnuniyyət hissi yaradacaq. Yox, əgər bu məsələlər kifayət qədər öz həllini tapmayacaqsa, istiqamət üzrə sərnişinlərin daşınması və avtomobil yolları, yeni zolaq hesabına tramvay xətləri çəkiləcəksə, yolların bir zolaq itirilməsi ilə nəticələnəcəksə, bu, təbii ki, avtobusların daşınmasına da mane ola bilər”.

Müsahibimiz qeyd etdi ki, hazırdakı Pirşağı avtomobil yolunun davamı olaraq Pirşağı hissəsindən “Seebreze” ərazisinə tramvay xətlərinin çəkilməsi daha real görünür:

“Həmin ərazidə hazırda yolun kənarında məskunlaşma azdır, yolun genişləndirilməsi tramvay-trolleybus xəttinin inşa edilməsi məkan baxımından sərfəli görünür. Hər hansı tikinti-söküntü işlərinin aparılmasına isə zərurət olmadıqca ehtiyac olmayacaq. Amma Mehdiabad istiqamətində mənzillərin köçürülməsi, evlərin sökülməsi problem ola bilər, bura kifayət qədər böyük ərazidir. Evlərin plana düşməsi, sakinlərə dotasiyaların ayrılması, kompensasiyaların verilməsi iqtisadi cəhətdən də səmərəli olmalı, həmçinin, prosesləri özündə ehtiva etməlidir ki, vətəndaşlar da narazı qalmasın. Orada elə bir imkan da yoxdur ki, Azadlıq prospekti boyunca əlavə zolaq ayırasan və ya istifadə edəsən. Bu nöqteyi-nəzərdən proses çətinləşir. Məsələnin necə tənzimlənəcəyini isə zaman göstərəcək”.

Günay Rəsulqızı