Yol polisindən dumanlı hava ilə bağlı MÜRACİƏT

Hazırda respublika ərazisində müşahidə olunan dumanlı hava şəraiti ilə əlaqədar Abşeron yarımadası da daxil olmaqla, bir sıra bölgələrdə görünüş məsafəsi 50-500 metrədək məhdudlaşıb.

Sfera.az bildirir ki, Baş DYP İdarəsi bununla əlaqədar yol hərəkəti iştirakçılarına müraciət edib. Qurumdan qeyd olunub ki,  dumanlı hava digər hərəkət iştirakçılarını və nizamlama vasitələrini vaxtında və aydın görünməsinə maneə yaradır.

“Buna görə də, sürücülərə belə havalarda daha diqqətli olmaq, sürət həddini hava şəraitinə uyğun seçmək, nəqliyyat vasitələrinin, xüsusilə xarici işıq cihazlarının sazlığına diqqət yetirmək, ötmə və manevr etmə zamanı təhlükəsizlik qaydalarına ciddi riayət etmək tövsiyə olunur”, - idarədən bildirilib.

Qurum həmçinin piyadalara da çağırış edib: “Piyadalardan isə dumanlı hava şəraitində sürücülərin yolun hərəkət hissəsini və kənarlarını aydın görməkdə çətinlik çəkdiklərini nəzərə alaraq, yola çıxarkən daha məsuliyyətli olmalarını xahiş edirik”.

Günay