Tanınmış aparıcı, Əməkdar mədəniyyət işçisi Rahib Azəri kövrək anlar yaşayıb.

Sfera.az bildirir ki, o, dizayner Aynur Xəlilovanın “Hərşeyşünas” adlı podkastında görkəmli cazmen Vaqif Mustafazadə ilə bağlı xatirəsini bölüşüb:

“Hər il Vaqifin anadan olduğu və vəfat etdiyi tarixi qeyd edirəm, bunu özümə borc bilirəm. “ANS”də işlədiyim zamanlarda bir hadisə baş verdi. Dekabrın 16-sı Vaqifin vəfat etdiyi gün idi, mən də verilişi ona həsr etmişdim. Hazırda Muğam Mərkəzində işləyən dəyərli bir dostumuz Lalə xanım mənə zəng etdi və dedi ki, gecə yuxuda Vaqifi görmüşəm, çox kədərli idi. Kənardan radiodan sənin səsin gəlirdi və Vaqif gileyləndi ki, bir dənə o yada salır məni...Dedi ki, mənim təşəkkürümü ona bildir. Beləcə Lalə xanım gördüyü bu yuxunu mənə danışdı. Onda da hazırda olduğu kimi çox kövrəldim. Bu hadisənin üstündən 3 ay keçir və efirimi bitirəndə məni çağırdılar ki, sənə zəng gəlib, Lalə xanımdır. Dedim, nolub ay Lalə? Görürəm, qızın səsi birtəhərdir. Mənə dedi ki, inanırsınız, mən Vaqifi yuxuda gördüm yenə və mənə gülə-gülə dedi ki, təşəkkürümü ona çatdırdın. Bundan sonra gəl mistikaya inanma...Bir aparıcı kimi özümə bunu borc bilirəm ki, bu cür insanları yada salmışam. Bunu öz tarixi missiyam hesab edirəm..Yaşa dolduqca adam kövrəkləşir…”.

Aparıcının “Kimdir, Azərbaycan elitası?” sualına isə Rahib Azəri bu cür cavab verib:

“10 il, Bakı Caz Festivallarının aparıcısı olmuşam. Mən kimləri görmüşəm səhnədə, kimlərlə bir səhnədə dayanmamışam. Bir dəfə Sevda Ələkbərzadə ifa etməli idi, səhnəyə çıxmamışdan öncə mən, daha sonra Sevda özü də xahiş etdi ki, çəngəl-bıçağın səsinə bir qədər diqqət edin, insanın fikrini yayındırır. Ona görə bəziləri caza kübar görünmək xatirinə qulaq asmağa gəlirdilər.Kübarlıqla bağlı mənim bir aforizmim var: “Toylarda geyilən əlbisələrin uzunluğu kübarlıqdan xəbər verən əsas xüsusiyyətdir”. Toyda kübar cəmiyyətin geyindiyi əlbisəni geyinən adam elə bilir ki, kübardır. Amma bəzən kübar bildiyimiz adamlardan elə davranış görürük ki, deyirsən mən bunu normal adam bilirdim”.

Türkan

"Çox kədərli idi, dedi ki, məni bircə o yada salır..." - Rahib Azəri kövrəldi + VİDEO