Səhv düşəndə yerimiz... - Digər zolaqlara girən avtobus sürücülərini hansı cəza gözləyir?
Paytaxt ərazisində avtobus zolaqları olsa da, zaman-zaman bəzi müvafiq ictimai nəqliyyat vasitələrinin bu zolaqdan istifadə etmədiyinin, digər avtomobillərin istifadə etdiyi yola girdiyinin şahidi oluruq. Bu da istər-istəməz avtomobil sürücülərində də müəyyən narahatlıqlar yaradır.
Bu məsələ necə tənzimlənməlidir? Avtobus zolağından istifadə etməyən nəqliyyat vasitələrinə qarşı hansısa tədbirlərin görülməsinə ehtiyac varmı?
Bununla bağlı Sfera.az-a açıqlama verən nəqliyyat məsələləri üzrə ekspert Aslan Əsədov deyib ki, hər hansı bir şəxsin yol hərəkəti qaydalarına laqeyd yanaşması, onun digər yol hərəkəti iştirakçılarının gediş-gəlişinə problem yaratması yolverilməzdir.
Müsahibimiz bildirib ki, avtobus zolaqları ictimai nəqliyyatın səmərəli və təhlükəsiz hərəkətini təmin etmək üçün yaradılıb:
“Əgər bəzi avtobuslar bu zolaqlardan istifadə etməyib digər yollara keçirsə və bu, hərəkət iştirakçılarına maneə yaradırsa, bu, qayda pozuntusu hesab olunur. İstər qanuni, istərsə də vətəndaş mövqeyi tərəfindən bu, yaxşı hal kimi qəbul edilmir. Belə hal cəmiyyətdə də müəyyən diskusiyalara səbəb olur. Çünki avtobuslarla bağlı kifayət qədər irihəcmli layihələr işlənilib, böyük vəsaitlər ayrılıb. Hər bir ictimai nəqliyyat vasitələrinin hərəkəti üçün geniş imkanlar yaradılıb. Bu gün hər hansı bir sürücünün yol hərəkəti qaydalarına məsuliyyətsiz yanaşması ona başucalığı gətirmir”.
Ekspert hər kəsin qaydalara əməl etməli olduğunu vurğulayıb:
“Bu cür sürücülərin atdığı addım, ümumi olaraq bu qədər çəkilən zəhmətləri bir növ aşağılayır. Ona görə də belə hallar yolverilməzdir. Digər tərəfdən, belə hallar üçün cərimələr nəzərdə tutulmayıb. Amma həmin sürücünün vəsiqəsinə 40 manat yazılmaqla, yol hərəkəti iştirakçılarının ümumi qayda pozuntusu konteksində cərimələnə bilər. Buna baxmayaraq dediyim kimi, zolaqdan çıxmaqla bağlı cərimə yoxdur”.
Günay Rəsulqızı
