Yeni il süfrəsi təxminən neçəyə başa gələcək? - Bazarlardakı QİYMƏTLƏR
Yeni il ərəfəsi ənənəvi olaraq bazarlarda canlanma dövrüdür. Azərbaycanda bu dövr ərzində əsas ərzaq məhsullarının qiymətlərində nəzərəçarpacaq artım müşahidə olunur. Həm mövsümi faktorlar, həm də bayram tələbatının yüksəlməsi ərzaq məhsullarının qiymətinə təsir edir.
Bəs orta statistik ailənin Yeni il süfrəsi təxminən neçəyə başa gələcək?
Sfera.az bildirir ki, Bakı və ətraf bazarlarda meyvə, tərəvəz və digər ərzaq məhsullarının qiymətləri aşağıdakı kimidir:
Mandarin: 1 kiloqramı 2.50-4 manat arasında dəyişir
Alma: 2.25-4 manat
Armud: 1.99-4 manat
Heyva: 1.65-3 manat
Xurma: 1.35-2 manat
Banan: 3 manat
Ananas: 5 manat
Kivi: 5 manat
Mandarin: 3 manat
Kök: 1.09 manat
Bibər: 3.59-6.49
Pomidor: 2.89-6 manat
Xiyar: 3.39-5 manat
Kartof: 0.89-1,6 manat
Soğan: 0.59-1,4 manat
Quzu əti: 20-22 manat
Mal əti: 15-18 manat
Təbii ki, bayramlarda demək olar ki, hər azərbaycanlının süfrəsinin əvəzolunmaz təamı, yeməklərin şahı “Şah plov”dur. “Şah plov”un hazırlanması üçün lazım olan inqridiyentlərin qiyməti aşağıdakı kimidir:
Düyü: kiloqramı 3-8 manat aralığında dəyişir
Şabalıd: 10 manat
Qoz: 8-9 manat
Fındıq: 6-8 manat
Qoz ləpəsi: 19 manat
Fındıq ləpəsi: 22 manat
Kişmiş (ağ): 9-18 manat
Kişmiş (qara): 12-20 manat
Alça turşusu: 6 manat
Albuxara: 9 manat
Ərik turşusu: 17 manat
2023-cü ilin dekabrında oxşar dövr ərzində qiymətlər cari vəziyyətdən daha aşağı idi. Belə ki, ötən ilin müvafiq dövründə pomidorun 1 kiloqramı 2.40 manat ətrafında dəyişirdi.
Digər məhsulların qiyməti aşağıdakı kimi olub:
Xiyar: kiloqramı 2.40 manat
Mal əti: 14-16 manat
Qoyun əti: 15-16 manat
Toyuq əti: 6 manat
Toyuq filesi: 8.9 manat
Dövlət Statistika Komitəsinin məlumatına görə, ötən ilin müvafiq dövrü ilə müqayisədə qida məhsulları, içkilər və tütün məmulatları 5 faizədək bahalaşıb. O cümlədən, ət və ət məhsulları 6 faiz, meyvələr 10 faiz, tərəvəzlər 7 faiz, yağlar 4 faizdən çox, mineral su və şirələr 5 faiz, spirtli içkilər (araq, konyak) 5 faiz bahalaşıb.
Son bir il ərzində ərzaq məhsullarında ümumi inflyasiya isə 5%-ə yaxın olub.
Qeyd edək ki, idxal olunan məhsullarda daha çox bahalaşma müşahidə edilir. Xüsusilə sitrus meyvələrinin qiymətində yüksək artım qeydə alınıb.
Qiymət artımının bir neçə əsas səbəbi var. Belə ki, Yeni il süfrəsi üçün ən çox alınan məhsullara tələbatın artması qiymətləri yüksəldir. Sitrus meyvələri və ekzotik meyvələrin qiyməti idxal xərclərinin artması səbəbindən yüksəkdir. Beynəlxalq bazarlarda ərzaq məhsullarının bahalaşması, o cümlədən daşınma və logistika xərclərinin artması yerli bazarlara da təsir edir. İqlim şəraiti səbəbindən yerli məhsulların miqdarı azalır, idxal məhsulları üstünlük təşkil edir.
Bazarlarda qiymətlərdən narazı olan alıcılar bunu xüsusilə vurğulayır.
“Hər il bayram öncəsi qiymətlər artır. Sadə ailələr üçün yaxşı süfrə hazırlamaq çətinləşib”, - alıcılar bildirir.
Satıcılar isə artımı təchizatçılardan gələn yüksək qiymətlərlə əlaqələndirirlər.
Azərbaycanda orta ailə 4 nəfərdən ibarətdir. Qiymətləri nəzərə alsaq, Yeni il bayramı üçün minimum səviyyədə süfrə qurulması təxminən 300-400 manat tələb edir.
Firuzə Əliyeva
