Bu il şam ağacı və bəzəkləri neçəyə başa gələcək? - MƏBLƏĞLƏR

Bakıda Yeni il bayramı yaxınlaşdıqca, şəhər sakinləri və qonaqlar şam ağacı, bəzəklər və işıqların qiymətləri ilə maraqlanırlar. Bu il də mağazalar və onlayn platformalar müxtəlif ölçü və dizaynda məhsullar təklif edirlər.

Bəs qiymətlər hansı aralıqdadır?

Sfera.az bildirir ki, ümumilikdə qiymətlərdə artım müşahidə olunur.

Ötən il 150 sm-lik şam ağacının qiyməti 69 manat, 120 sm-lik ağacın isə 44-48 AZN aralığında olub. Bu il isə qiymətlərdə artım 30-40 manat civarındadır.Belə ki, qiymətlər ölçüsünə görə dəyişir.

Məbləğlər ortalama aşağıdakı kimidir:

120 sm-lik ağac: 108 - 130 AZN

150 sm-lik ağac: 190 AZN

180 sm-lik ağac: 220 - 260 AZN

210 sm-lik ağac: 310 - 345 AZN

240 sm-lik ağac: 445 AZN

270 sm-lik ağac: 498 - 550 AZN 

Həmçinin şam ağaclarının formasına görə də qiymətlər müxtəlifdir. Ən ucuz şam ağacları sadə formada olanlardır. Onların qiymətli 90-170 manat aralığında dəyişir. Üzəri ağ olan şam ağacları isə bir qədər bahadır. Qiyməti 200-250 manatdır. Parklarda quraşdırılan şam ağacları isə sifarişlə gətirilir. Belə ki, park üçün ən bahalı şam ağacı 18 metr uzunluğundadır və 30 min manata başa gəlir. Şam ağacının quraşdırılması altlığı ilə birlikdə 50 min manata başa gəlir ki, belə şam ağacları əsasən rayon və şəhər icra hakimiyyətləri tərəfindən, dövlət qurumları tərəfindən sifarişlə gətirilir.

Bəzək aksesuarlarında da 5-15 manat bahalaşma var. 

Şam ağacı üçün LED işıqların qiyməti 10 metr üçün 3.40 manatdan başlayır. Ən bahalısı isə 200 metr uzunluğundadır və 150 manatdır. Ev və bağ üçün LED proyektorlar 50-150 manat aralığındır.

Yeni il üçün bəzək aksesuarlarının qiyməti keyfiyyətinə görə 3 manatdan 100 manata qədər dəyişir. Materialı şüşədən olan bəzək aksesuarlarının bir qutusu 70 manatdan başlayır. Əl işləri ilə hazırlanmış xüsusi bəzəklər 20-30 manat arasında dəyişir. Qar adamı, Santa Klaus və ya maral fiqurları 15-50 manat, LED işıqla təchiz edilmiş fiqurlar isə 50-100 manat aralığındadır. Şaxta babanın qiyməti 10 manatdan 200-250 manatadək dəyişir. Qar spreyi (250 ml) 5-8 manat, süni qar paketi isə 10-20 manatdır.

Bakıda Yeni il bayramı ilə bağlı alış-veriş siyahısına yalnız şam ağacı və bəzəklər deyil, həm də digər məhsullar daxildir. Bu məhsulların qiymətləri ilə bağlı ətraflı məlumatı təqdim edirik:

Yeni il üçün bəzəkli süfrələrin qiyməti 20-50 manat, şamların isə 5-15 manat aralığında dəyişir. Bayramla bağlı hədiyyəlik səbətlər də var ki, klassik səbət (şirniyyat, çay və aksesuarlarla) 30-50 manat, premium səbət (şərab, pendir və xüsusi delikateslərlə) 100-200 manat aralığındadır.

Yeni il geyimləri uşaqlar üçün 20-50 manat, böyüklər üçün 50-100 manat aralığında, Yeni il temalı sviterlərin adi dizaynda olanları 25-40 manat, yüksək keyfiyyətli xüsusi dizaynda olanlar isə 50-70 manat aralığında dəyişir.

Keçən il Yeni il məhsulları üçün qiymətlər daha stabil idi, lakin bu il bir çox məhsulda inflyasiya səbəbindən artım müşahidə olunur. Xüsusilə import olunmuş məhsulların qiyməti xeyli yüksəlib. Bu baxımdan yerli istehsal məhsulları almaq həm daha sərfəli, həm də milli iqtisadiyyata dəstəkdir.

Bu siyahını nəzərə alaraq, ailəniz və dostlarınız üçün əyləncəli və büdcəyə uyğun Yeni il alış-verişi edə bilərsiniz.

Firuzə Əliyeva