Türkiyədə sosial şəbəkələr bu şəxslərə qadağan edilə bilər - Nazir AÇIQLADI

Türkiyə hakimiyyəti 16 yaşdan kiçik uşaqların sosial şəbəkələrə və onlayn oyunlara girişini məhdudlaşdıra bilər.

Sfera.az xəbər verir ki, bu barədə ölkənin nəqliyyat və infrastruktur naziri Əbdülkadir Uraloğlu məlumat verib.

“16 yaşdan kiçik uşaqlarımızı sosial medianın və onlayn oyunların zərərindən qorumaq və bu cür zərərli məzmunun yayılmasının qarşısını almaq üçün qanunvericiliyə ehtiyac zərurətə çevrilib. Bu, ilk növbədə internet provayderlərinin və sosial şəbəkə platformalarının sahiblərinin məsuliyyətini artıracaq”, - nazir parlamentdə büdcə dinləmələrində deyib.

Onun sözlərinə görə, Türkiyə hakimiyyəti sosial şəbəkələrdə zorakılıq, uşaq istismarı, nifrətə çağırış və digər neqativ məzmunlu materialların yayılması ilə əlaqədar məhdudiyyətlərin tətbiqi məsələsini öyrənməyə başlayıb.

“Qurumlarımız ailə işləri, ədliyyə və daxili işlər nazirlikləri ilə birgə müvafiq işlər görür. Bir vətəndaş və bir rəhbər kimi parlamentimizdən lazımi hüquqi tədbirlər görməsini gözləyirəm. İnanıram ki, birlikdə hərəkət etməklə, biz bu təhlükəni dəf edə və uşaqlarımız üçün daha təhlükəsiz gələcək təmin edə bilərik”, - nazir bildirib.

Firuzə Əliyeva

Sfera.az