Elektrik avtobusu enerjisi bitdiyi üçün yolda qalıb? - RƏSMİ AÇIQLAMA

Son günlər elektrik avtobuslarının enerji təminatı ilə bağlı müəyyən suallar və müzakirələrə rast gəlinir. Belə ki, elektrik mühərrikli avtobusun enerji ehtiyatı qurtardığı üçün yolda qaldığı iddia edilən video da sosial şəbəkələrdə gündəm olmuşdu.

Məsələ ilə bağlı Sfera.az-a açıqlamasında “BakuBus” MMC-nin İctimaiyyətlə Əlaqələr Şöbəsinin müdiri Əsmər Əliyeva bəzi məqamlara aydınlıq gətirib.

Onun sözlərinə görə, elektrik avtobuslarının enerji səviyyəsi daim diqqət mərkəzində saxlanılır:

“Avtobuslar marşrut xəttindən qayıtdıqdan sonra qarajda 3 saat ərzində 100% enerji dolumu ilə təmin olunur. Bu, növbəti gün ərzində marşrut xəttində əlavə enerji dolumuna ehtiyac olmadan nəzərdə tutulan məsafəni qət etməyə imkan verir”.

Ə.Əliyeva qeyd edib ki, əlavə nəzarət mexanizmi də mövcuddur:

“Enerji səviyyəsi 50%-dən aşağı düşdükdə sürücülərə növbə dəyişikliyi zamanı HUB-larda enerji dolumu ilə bağlı təlimatlar verilir. “Enerji bitdi, avtobus dayandı” kimi halların baş verməsi mümkün deyil. Lakin nəzərə almaq lazımdır ki, avtobus nəqliyyat vasitəsidir qəza, fors-major səbəbindən yolda dayanma halları baş verə bilər. Bu, enerji səviyyəsindən asılı olmayan bir amildir. Bütün sərnişinlərimizdən xahiş edirik ki, dəqiq və doğru məlumatları paylaşaq. Yanlış informasiya sərnişinlər arasında çaşqınlığa səbəb ola bilər”.

Firuzə Əliyeva

Sfera.az