Bu gün Milli Məclisin İqtisadi siyasət, sənaye və sahibkarlıq komitəsində “Vergi Məcəlləsinə” təklif edilən dəyişikliklər müzakirə edilib və qəbul olunaraq plenar iclasa tövsiyə olunub. Dəyişikliklərə əsasən, gələn ildən bir sıra xidmət sahələri üzrə illik dövriyyəsi həcmi 45 min manatadək olan mikro sahibkarların gəlirlərinə 75 faiz güzəşt tətbiq olunacaq. Layihəyə əsasən, proqram təminatının işlənməsi, layihə-dizayn, tərcümə xidməti, araşdırma və tədqiqat sahəsi, hüquq, sərbəst auditor, jurnalist fəaliyyəti, turizm bələdçiliyi, qiymətləndirmə fəaliyyəti və s. istiqamətlər üzrə vergi güzəşti tətbiq olunacaq.

Sfera.az bildirir ki, iqtisadçı deputat Vüqar Bayramov bununla bağlı fikirlərini bölüşüb.

O qeyd edib ki, VÖEN alaraq xidmət müqaviləsi əsasında fəaliyyət göstərənlər 2025-ci ildən etibarən gəlirlərindən 20 faiz deyil, 5 faiz vergi ödəyəcəklər:

“Eyni zamanda, onlardan 3 işçi və dövlət sığorta haqqı üzrə borcun olmaması tələbi də istənilməyəcək. Məsələn, vətəndaşımız jurnalist kimi fəaliyyət göstərir və xidmət müqaviləsi əsasında vəsait alır və onun aylıq gəliri 3 min manatdır. Bu halda, o, gəlirindən gələn ildən etibarən 600 manat deyil, cəmi 150 manat vergi ödəyəcək”.

Millət vəkili qeyd edib ki, güzəştlər xidmət müqaviləsi əsasında çalışan şəxslərə şamil olunur:

“Yeni qaydalar mikro sahibkarların dəstəklənməsi baxımından vacib dəyişiklik hesab olunur. Bu, qeyd edilən xidmət sahələri üzrə dövriyyənin artmasını stimullaşdıra bilər”.

Günay