Məlum olduğu kimi, Dövlət İmtahan Mərkəzi taksi sürücüləri üçün imtahanlar keçirir. İyulun 1-dən sonra xüsusi hazırlıq keçmiş taksi minik avtomobili sürücüləri üçün ilk belə imtahan avqustun 25-də baş tutub. Növbəti imtahan isə noyabrın 3-nə təyin olunub. Digər tərəfdən, hər nə qədər taksi xidməti sahəsində tənzimləmələr aparılsa da, sürücü-sərnişin problemi hələ də müşahidə olunur.

Maraqlıdır, DİM-in keçirdiyi imtahan mövcud problemləri aradan qaldıra bilərmi? 

Bununla əlaqəli Sfera.az-a açıqlama verən nəqliyyat məsələləri üzrə ekspert Aslan Əsədov deyib ki, indiyə qədər taksi sürücüləri ilə bağlı müəyyən anlaşılmazlıqlar qeydə alınıb:

“Sosial şəbəkələrdə görüntülər paylaşılıb, müxtəlif problemlər müzakirə olunub. Bu və ya digər formada taksilər və ya sürücülərlə bağlı məsələlərin müsbət qarşılanmadığı hallar da olub. Digər tərəfdən, insanların yol hərəkəti haqqında qanuna inamını artırmaq, onların yol hərəkətinin təşkili, təhlükəsizliyi ilə bağlı güvənini qazanmaq lazımdır.  Düşünürəm ki, vətəndaşlarımız neqativlərə qarşı daha adekvat olmalıdır ki, qanunun icazə verdiyi maksimum həll yollarını da araşdıra bilsinlər”.

Aslan Əsədovun fikrincə, DİM-in təşkil etdiyi imtahanlar isə qeyd edilən aspektdə önəm daşıyır:

“İmtahanın öz imkanları, daxili resursları var. DİM-in təşkil etdiyi imtahanlar xüsusi qaydalar çərçivəsində keçirilir. Sözügedən imtahanlardan uğurla keçən kifayət qədər taksi sürücüləri var. Bu da həm onların özlərində, həm də cəmiyyət daxilində inam formalaşdırır”.

Günay Rəsulqızı