Azərbaycanda mobil telefonla danışıq azalır - RƏQƏMLƏR

Azərbaycanda mobil telefonla danışığın həcmi ilbəil azalır. 

Sfera.az rəsmi statistik məlumatlara istinadən xəbər verir ki, bu hal 2021-ci ildən müşahidə olunur. Həmin tarixdən başlayaraq mobil telefonla ölkə daxilində danışığın trafikinin həcmi sürətlə azalır.

2021-ci ildə ölkədaxili mobil telefon trafiki 19,73 milyard dəqiqə olduğu halda, 2022-ci ildə 18,1 milyard dəqiqə, ötən il isə 15,445 milyard dəqiqə olub. 

Eyni hal mobil telefonla beynəlxalq danışıqlarda da müşahidə edilir. Son 5 ildə beynəlxalq danışıqlar təxminən 3 dəfə azalaraq 11 milyon dəqiqəyə düşüb.  

Mobil telefon rabitəsi ilə danışığın azalmasının səbəbi internet vasitəsilə danışığın artmasıdır. Xüsusən, “WhatsApp” tətbiqi vasitəsilə danışıqların artması mobil trafikin həcmini azaldıb. 

Ölkə daxilində mobil genişzolaqlı internet trafiki son 5 ildə 2,5 dəfə artaraq 0,4 exebayta (bir exebayt 1074 terabaytdır - red.) çatıb. 2019-cu ildə bu göstərici 0,16 exebayt idi. Dinamikadan görünür ki, qarşıdakı illərdə də mobil internetdən istifadə edərək danışıq aparılmasının həcmi daha da artacaq. 

Vasif