“Ramazan orucunun savabını artıran əməllərdən biri də oruclu insanlar üçün iftar süfrələrinin təşkilidir”.

Bunu Sfera.az-a açıqlamasında ilahiyyat üzrə fəlsəfə doktoru Ceyhun Məmmədov deyib. O qeyd edib ki, bu gün iftar süfrələrinin təşkili əksər müsəlman ölkələrində geniş yayılıb.

“İslamın bütün ibadətlərinin əsas qayəsi həm də ictimai faydaya nail olmaqdır. Məhəmməd Peyğəmbər (s) buyurub: “Kim bir orucluya iftar verərsə, oruclu qədər savab qazanar. Oruclunun savabından da heç nə əskilməz”.

Burada əsas məqsəd həm də insanlar arasında birlik və həmrəyliyi daha da gücləndirməkdir”.

C.Məmmədov bildirib ki, digər aylarda olduğu kimi, Ramazan ayında da imkansız insanlara əl tutmaq, onları iftar süfrələri təşkil edərək sevindirmək məqsədəuyğundur:

“Bunu edə bilmiriksə, ən azı gücümüz çatan qədər ərzaq yardımı edək”.

Qeyd edək ki, bu il Ramazan ayı martın 11-də başlayıb. Aprelin 10-u və 11-i Fitr bayramıdır.

Türkan