"Bu ailələrə də ünvanlı sosial yardım verilsin" - Millət vəkili
Ünvanlı sosial yardım alanların sayı azalıb.
Bunu Sfera.az-a açıqlamasında deputat Vüqar Bayramov deyib.
O bildirib ki, Dövlət Statistika Komitəsinin məlumatına görə, 2023-cü ilin yekunların əsasən, 64 min ailənin 272 min 300 üzvü ünvanlı sosial yardım alıb:
“Statistik təhlil göstərir ki, ötən il ünvanlı sosial yardım alanların sayı əvvəlki illə müqayisədə 18 min 500 nəfər azalıb. Bu, eyni zamanda, 2023-cü ildə yardım alan ailələrin sayında da azalmanın olması deməkdir. Ötən il bu sosial yardımı alan ailələrin sayı əvvəlki illə müqayisədə 1500 daha az olub. Bütün bunlarla yanaşı, 2023-cü ilin yekunlarında bir nəfərə düşən orta aylıq məbləğ 88,09 manatdan 114,3 manatadək yüksəlib. Bu daha çox ötən il ehtiyac meyarı həddinin 2022-ci illə müqayisədə 23 faiz artırılaraq 246 manat müəyyənləşdirilməsi ilə bağlı olmuşdur”.
Millət vəkili qeyd edib ki, ünvanlı sosial yardım alanların sayındakı azalma bu istiqamətdə şərtlərə yenidən baxılmasını daha da aktuallaşdırır:
“Məsələn, ailənin mülkiyyətində və ya istifadəsində nəqliyyat vasitəsi olduqda o yardıma müraciət etmək hüququna malik olmur. Halbuki, daha məqsədəuyğun olardı ki, bu tələb istehsal ili çox köhnə olan avtomobillərə şamil edilməsin. Aydındır ki, buraxılış ili çox köhnə olan avtomobil nə dəyər baxımdan, nə də ailənin gəlir mənbəyi baxımından xüsusi paya malik ola bilir”.
Sonda V.Bayramov vurğulayıb ki, bütövlükdə, son statistika ünvanlı sosial yardım proqramı ilə bağlı mövcud fiskal imkanlar çərçivəsində təkmilləşdirilmələrin aparılmasını daha da prioritetləşdirir.
Firuzə Əliyeva
