Londonda Azərbaycan haqqında saytın təqdimatı oldu

 

Böyük Britaniyanın paytaxtı London şəhərində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə yaradılan "In Azerbaijan” (//inazerbaijan.co.uk/) internet portalının təqdimat mərasimi keçirilib. Sfera.az-ın məlumatına görə, Azərbaycanın Böyük Britaniyadakı səfirliyində keçirilən təqdimat mərasimində səfirliyin əməkdaşları, yerli gənclər təşkilatlarının nümayəndələri və tələbələr iştirak ediblər. Təqdimat mərasimində çıxış edən səfirliyin 1-ci katibi Polad Məmmədov bu cür təşəbbüslərin əhəmiyyətini vurğulayaraq, "No Collective” təşkilatının həyata keçirdiyi layihənin hər iki ölkənin cəmiyyətləri arasında əlaqələrin genişləndirilməsinə təkan verəcəyini deyib. Daha sonra "NO Collective” təşkilatının rəhbərlərindən olan xanım Natali Beys portalı tədbir iştirakçılarına təqdim edib: "Portalın hazırlanması məqsədi ilə zəruri məlumatları toplamaq üçün biz Bakıya səfər etmişik. Azərbaycanın tarixi, mədəniyyəti, turizm potensialı, ictimai-siyasi həyatı haqqında saytda geniş məlumatlar yerləşdirilib. Portalda həmçinin Azərbaycan və Böyük Britaniya gənclərinin yazışdığı interaktiv bloq və müvafiq tədris materiallarına da yer ayrılıb. Saytdakı xəbərlər mütəmadi şəkildə yenilənəcək”.

Qeyd edək ki, təqdimat mərasimindən öncə xanım Beys paytaxt London ərazisində yayımlanan "London Live” televiziya kanalının qonağı olub və izləyicilərə portal haqqında ətraflı məlumat verib. Adıçəkilən televiziya kanalını ancaq Böyük Britaniyada ərazisində izləmək mümkün olduğu üçün, müsahibənin kiçik hissəsini layihə çərçivəsində hazırlanmış feysbuq səhifəsində (//www.facebook.com/pg/InTheLandOfFire/videos/?ref=page_internal) izləyə bilərsiniz.