Pensiyaçıların sayı niyə azalıb? - Millət vəkili səbəbləri AÇIQLADI

Pensiyaçıların sayının azalması səbəblərini müəyyənləşdirmək üçün pensiyaçıların strukturundakı dəyişikliklərə diqqət yetirmək lazımdır. 

Sfera.az xəbər verir ki, bunu pensiyaçıların sayında azalmanı şərh edən zaman millət vəkili, iqtisadçı Vüqar Bayramov bildirib. 

Millət vəkili Dövlət Statistika Komitəsinə istinadən xatırladıb ki, 2023-cü ildə pensiyaçıların sayı 18 min 200 nəfər azalaraq 1 milyon 96 min olub. 

Onun sözlərinə görə pensiyaçıların sayında azalmaya səbəb pensiyaçıların strukturu üzrə dəyişikliyin baş verməsidir: “2022-cü ilin yekunlarına görə yaşa görə pensiya alanların sayı 696 min 375 nəfər olub. 2024-cü ilin yanvarın 1-də isə bu rəqəm 701 min 440 nəfər idi. Deməli, pensiya yaşı tamam olaraq pensiyaya çıxanların sayında azalma yoxdur. Əksinə yaşa görə pensiya alanların sayı 5 min 65 nəfər artıb. Ötən ilin yekunlarında əlilliyə görə pensiya alanların sayı 258 min 656 nəfər olub. 2022-cü ilin sonuncu günü isə ölkədə 272 min 979 nəfər əllillyə görə pensiya alıb. Bu isə o deməkdir ki, ötən il ərzində əlilliyə görə pensiya alanların sayı 14 min 323 nəfər azalıb.Ailə başçısının itirilməsinə görə pensiya alanların sayı isə bu ilin ilk gününə 135 min 904 nəfər olub. Bir il öncə bu rəqəm 144 min 846 nəfər idi. Deməli, ailə başçısının itirilməsinə görə pensiya alanların sayı da ötən il ərzində 8 min 942 nəfər azalıb. Bütövlükdə, əlilliyə və ailə başçısının itirilməsinə görə pensiya alanların sayı ötən il ərzində 23 min 265 nəfər azalıb. Bu statistik təhlil göstərir ki, yaşa görə pensiya alanların sayında artımın olmasına baxmayaraq digər iki əmək pensiyası üzrə azalma ümumi pensiya alanların sayını azaldıb”. 

V.Bayramov hesab edir ki, pensiyaçıların sayındakı bu struktur dəyişikliyi pensiya islahatlarının daha da dərinləşdirilməsini və əlilliyə, ailə başçısının itirilməsinə görə pensiya alanların sayının azalması səbəblərinin tam araşdırılmasını aktuallaşdırır.

Vasif