Ekspertdən yayılan həmin görüntülərlə bağlı AÇIQLAMA: "Eyni nömrəni təkrar çap edib..." - FOTO

Bakıda bəzi avtomobillərin üzərində olan bahalı nömrələrin oğurlanması və qarşılığında pul tələb edilməsi ilə bağlı sosial şəbəkələrdə görüntülər yayılıb. Məlum olub ki, bu kimi hadisələr dəfələrlə baş verib.

Sfera.az bildirir ki, bununla bağlı fikirlərini bölüşən nəqliyyat məsələləri üzrə ekspert Ərşad Hüseynov deyib ki, həmin şəxslər qanunvericilikdə və təcrübədə sovet dövründən qalan lazımsız, çoxdan ləğv edilməli müddəadan istifadə etməyə çalışırlar.

“Onların "bazar"ını bağlamaq üçün itən və ya oğurlanan nömrənin əvəzinə, elə həmin nömrəni təkrar çap edib vermək lazımdır. İndi bilirlər ki, nömrənin biri olmasa, avtomobil sahibi məcbur olub, tam başqa hərf və rəqəmləri olan nömrə alacaq. Ona görə də bazarlığa cəsarət edirlər”.

Ekspert bildirib ki, problemi kökündən həll etmək lazımdır:

“SSRİ dağılandan sonra bütün respublikalar bu lazımsız qaydanı ləğv edib. Bunun üçün qanunda cəmi 2-3 sözdən ibarət dəyişiklik edilməlidir. İtən və ya oğurlanan nömrənin yenidən çap edilməsi heç bir problem yarada bilməz. Hər yer kamera və digər nəzarət sistemləri ilə doludur. Eyni nömrənin təkrar çap edilməməsinin heç bir məntiqi yoxdur”.

Qeyd edək ki, qanunvericiliyə görə, itən nömrəni bərpa etmək mümkün deyil. Sürücü yalnız nömrə lövhəsi yararsız hala düşdüyü təqdirdə onu DYP şöbəsinə təqdim etməklə yenisinə ala bilər.

Günay