Azərbaycanda daha bir erkən nikahın qarşısı alınıb.

Sfera.az bildirir ki, bu barədə Azərbaycan Uşaqlar Birliyinin rəhbəri Kəmalə Ağazadə məlumat verib. O qeyd edib ki, Abşeron rayonunda 15 yaşlı qız 32 yaşlı əmisi oğlu ilə nişanlanıb.

“Azyaşlının tez bir zamanda evləndirilmə cinayətinin qarşısının alınması istiqamətində işə start verildi. Ana 5 uşağı təhsildən yayındırıb. 15 yaşlı qızı 32 yaşlı öz əmisi oğluna nişanlayıb. “İsti” münasibətlər üçün bütün lazımi şəraiti yaradıb. Qız oxumaq istəyir. Ana isə mənə məlumatın hardan çatdığını araşdırır”, - K.Ağazadə qeyd edib.

O, fikirlərini bu cür tamamlayıb: “Abşeron Rayon İcra Hakimiyyəti, Ailə, Qadın və Uşaq Problemləri üzrə Dövlət Komitəsi, Azərbaycan Respublikasının Daxili İşlər Nazirliyi - əminik ki, azyaşlıya qarşı seksual hərəkətlərin olunması ilə bağlı ciddi araşdırma aparılacaq”.

Ailə, Qadın və Uşaq Problemləri üzrə Dövlət Komitəsinin rəsmisi Teymur Mərdanoğlu hadisə ilə bağlı deyib ki, erkən nikah səbəbkarları - valideynlər Sabunçu Rayon İcra Hakimiyyətinə dəvət olunub və onlarla profilaktik söhbət aparılıb, izahatları alınıb:

“Azyaşlı və valideynlərinə eyni zamanda qarşı tərəf və onun valideyinlərinə qanunvericiliyin tələbləri izah olunaraq onlara xəbərdarlıq olunub. Onlar əməllərindən peşman olduqlarını bildirərək, qanunvericiliyin tələblərinə əməl edəcəklərini bildiriblər. Azyaşlı və onun ailəsi Ailə, Qadın və Uşaq Problemləri üzrə Dövlət Komitəsi, Rayon İcra Hakimiyyətinin həmçinin, rayon polis şöbəsinin nəzarətində saxlanılmaqla, yiyələndiyi peşə təhsilini davam etdirəcək”.

Günay