Məşhurların səsi və görünüşü ilə DƏLƏDUZLUQ: "Böyük miqdarda pullarını alırlar..." 

Son zamanlar sosial şəbəkələrdə birja yatırımı ilə bağlı paylaşımlar edilir. İnsanlara təklif edirlər ki, birjaya müəyyən qədər pul qoyun və qoyduğunuz məbləğin 2-3 qat çoxunu götürün.

Bəs həqiqətən birjaya yatırım etməklə, çox pul qazanmaq olur?

Mövzu ilə bağlı Sfera.az-a danışan iqtisadçı-ekspert Natiq Cəfərli bildirib ki, belə paylaşımların böyük əksəriyyəti fake olur.

“İnsanları aldatmaq üçün istifadə olunan üsullardan biridir. Bu barədə vətəndaşları bilgiləndirmək lazımdır. Bu üsulla insanların əlindən böyük miqdarda pullarını alırlar. Hətta tanınmış adamların səsindən və simasından da istifadə olunur. Bu elanlara və paylaşımlara inanmaq lazım deyil. Əgər bu vədlər düz olsaydı, hamı milyarder olardı”.

Ekspert diqqətə çatdırıb ki, birja həm də pul itirmək vasitələrindən biridir.

“Birjada səhm alışverişi etmək istəyən vətəndaşlar araşdırma edərək, bu işi görən şirkətlərlə əlaqə qurmalıdırlar. Bu zaman lisenziyası olan forex şirkətlərinə üstünlük verilməlidir”.

Ülkər Abdurahmanlı