Çox təəssüf ki, edilən məlumatlandırmalar, görülən tədbirlər, baş verən hadisələrə baxmayaraq,  ruhumuz belə incimədən cəmiyyətdə narkotikin təbliğatı aparılır. Belə ki, psixoaktiv/narkotik maddə mefedronun, yaxud mefedron tərkibli dərmanların “ləqəbi”, narkoşəbəkənin saytının adı paytaxtın müxtəlif ərazilərində divarlara yazılır. Bu divarlar xüsusən də, uşaqların, yeniyetmələrin təhsil aldığı məktəblərin yaxınlığı olur.

Sfera.az xəbər verir ki, bu barədə jurnalist Ömər Xəyyam öz Feysbuk səhifəsində paylaşım edib.

Onun sözlərinə görə, bu yazıları Xırdalan, Yasamal, Biləcəri, Yeni Günəşli, Qaraçuxur ərazilərində görüb:

“Bir çox divarlarda, fasadlarda bu cür qeydlər görmüşəm: “СК.МЕФ”, “24ks.cc”. Yəqin ki, siz də görmüsünüz. Əvvəl elə bilirdim, bu qeydlər qəzalı, yaxud plana düşmüş binalara dövlət qurumları tərəfindən yazılır, xüsusi nişandır. Təsadüfən “24ks.cc” yazıb axtarış etdim. Budur, “sintetik ölüm” cəngəlliyi! “МЕФ” “СК” psixoaktiv/narkotik maddə mefedronun, yaxud mefedron tərkibli dərmanların “ləqəbi” imiş. “24ks.cc” isə narkoşəbəkənin saytıdır, teleqram botuna bağlıdır”.

Ö.Xəyyam qeyd edib ki, bu ənənə bizə Belarusdan, Rusiyadan gəlib:

“Narkoşəbəkə divarlara "şüar"lar yazanlara ya havayı narkotik verir, ya da maaş. Bir az da araşdırdım, məlum oldu ki, Bakıda binaların fasadına, məktəb divarlarına narkotik satışını təbliğ edən şüarlar yazan 3 nəfər həbs edilib. Məlum olub ki, naməlum şəxslər “СК.МЕФ”, “ГИКС CC” kimi narkotiki təbliğ edən şüarlar yazmaqla ərazidə narkotik vasitələrin, psixotrop maddələrin satışı, təbliği ilə məşğul imiş”.

Jurnalist deyib ki, bu tip yazılara adi baxsaq da, insanlara şüuraltı təsir edir:

“Əfsus, bu məsələdən çoxu xəbərdar deyil, çoxu hadisənin mahiyyətini ötürüb, xəbər üç ənənəvi narkokuryerin həbsi kimi oxunub. Fəqət bu ayrı mərhələdir, diqqətli olmalıyıq. Bu tip qraffiti nümunələri bir növ, neyro linqvistik proqramlaşma metodudur. Mahiyyəti ağırlığında, təfəkkürü boyda telefon işlədən, sevgiyə, qayğıya möhtac, sözün hər iki mənasında dəfələrlə sındırılmış, dəfələrlə təhqir edilmiş travmalı gəncdən ötrü, əlbəttə, bu “işarələr” xoşbəxtliyin elçisidir. Özümüzü, uşaqlarımızı, məhəlləmizi, şəhərimizi, ölkəmizi, gələcəyi qorumalıyıq”.

DİN-in Mətbuat Xidmətinin əməkdaşı, polis baş leytenantı Zeyni Hüseynov şərhdə bildirib ki, məsələ nəzarətə götürülüb:

“Ərazi polisi məlumatlandırılıb. Tədbir görülür”.

Qeyd: Şəkillər dünən Yeni Günəşlidə (275 saylı məktəb tərəfdə) çəkilib.

Firuzə Əliyeva