Tez-tez təkrarlanan bu prosedurların riskləri: \"Dəri xərçəngi yaradır...\" - AÇIQLAMA
![Tez-tez təkrarlanan bu prosedurların riskləri: \](https://sfera.az/photo/orginal/2024/02/06/1707205057_02fc32b66fd40e99.jpg)
Dəblə ayaqlaşan zaman, onun fəsadlarına da hazır olmaq lazımdır. Qadınların əksəriyyəti gözəllik naminə hər ay, hətta bəzən, hər həftə dırnaqlarını manikür etdirir və qaynaq qoydururlar. Lakin hər bir qadının gözəllik proseduru olaraq etdirdiyi gellaklar insan orqanizminə çox zərərlidir.
Bəs gellakların və dırnaq manikürü prosedurunun zərərləri nədir?
Mövzu ilə bağlı Sfera.az-a danışan dermatoloq Aygün Mustafayeva bildirib ki, gellak və manikür proseduru zamanı istifadə olunan ultrabənövşəyi şüalar insan orqanizmi üçün çox ziyanlıdır.
“Manikür prosedurlarının tez-tez təkrarlanması dəri xərçəngi riskini artırır. Dırnaq ustalarının istifadə etdiyi lampalar radiasiya şüaları yayır ki, bu da, dəri hüceyrələrinin məhv olmasına səbəb olur”.
Dermatoloq bildirib ki, müntəzəm olaraq gellak və manikür prosedurlarından istifadə etmək tövsiyə olunmur.
“Həmçinin, davamlı olaraq dırnaqlara qaynaq etdirmək dırnaqların zəifləməsinə və gec uzanmasına səbəb olur. Hətta bəzi dırnaq ustalarının qeyri-peşəkar işi müəyyən infeksiyaların yaranmasına gətirib çıxarda bilər. Dırnaq ustaları istifadə etdikləri ləvazimatları təmizləmədikdə, dırnaqlara infeksiya sala və zədələyə bilərlər”.
Ülkər Abdurahmanlı