Aldadılan istifadəçilər, yuyulan “çirkli pullar”: Fenomenlərə NƏZARƏT EDİLƏCƏK?

Türkiyə Ticarət Nazirliyi sosial media fenomenlərinə nəzarət etmək və istifadəçilərin inamını artırmaq üçün mühüm addım atmağa hazırlaşır. Belə ki, qurum fenomenlər üçün işçi qrupları yaradacaq və “İnfluencer Sertifikat Proqramı” layihəsi həyata keçirəcək. Məlumata görə, bundan sonra dövlətdən sertifikat ala bilməyən blogerlər və məşhurlar influser ola bilməyəcək. Onlar reklam etdiklərini bəyan edəcək və izləyicilərini aldada bilməyəcəklər. 

Azərbaycanda da fenomenlərlə bağlı hüquqi tədbirlərin görülməsinə ehtiyac varmı? 

Məsələ ilə bağlı Sfera.az-a açıqlama verən deputat Azər Badamov bildirib ki, Azərbaycanda fenomenlərin sertifikatlaşdırılmasına hələ ki, ehtiyac yoxdur:

“Media haqqında qəbul olunmuş qanun həm dövrü, həm də sosial medianın fəaliyyətini qanun çərçivəsinə salıb. Burada media ilə bağlı bütün münasibətlər tənzimlənir. Amma cəmiyyət inkişaf etdikcə tələblər də dəyişir.. Ola bilsin ki,  gələcəkdə influserlərin sertifikatlaşdırılması məsələsi də aktuallaşsın. Bütün məsələlərin zamanın tələbinə uyğun tənzimlənməli olduğunu düşünürəm”.

Sosioloq Lalə Mehralı isə saytımıza açıqlamasında fenomenlərlə bağlı qanunun tətbiqi ilə razılaşdığını deyib:

“Məncə, doğru qərar olar, çünki fenomenlər reklam xatirinə hər şey edirlər. Keyfiyyətsiz məhsulu da reklam edirlər, orqanizmə zərərli qida əlavələrini də, təhlükəli kosmetik vasitələri də…Amma o sertifikat hansı əsaslarla veriləcək, nəyə xidmət edəcək, hansı meyarlara görə veriləcək - bunlar sual altındadır. Ümumilikdə məsuliyyət hissini artıracaqsa, istehlakçıya təminat verəcəksə niyə də olmasın? Yoxsa bəzi influserlərin “qırdı-qaçdı” üsulu ilə hələ çox istehlakçı aldadılacaq”.

Müsahibimiz vurğulayıb ki, bu cür qaydaların tətbiqi ilə həm də fenomenlərin küllü miqdarda olan qazancının mənbəyi aşkarlanar: “Beləcə, həm dövlətdən vergi qaçıra bilməyəcəklər, həm də reklam etdikləri məhsulun məsuliyyətini dərk edəcəklər”.

Firuzə Əliyeva