Alkoqol aludəsini buna məcbur etmək olmaz: \"100 qram araq belə...\"

2023-cü ilin statistikasına əsasən, Azərbaycan alkoqolizmdən qeydə alınan ölümlərə görə 183 ölkə sırasında 53-cü yerdədir. Bu, sadəcə qeydə alınan göstəricidir.

Bəs insanları alkoqol aludəliyindən necə xilas etmək olar?

Mövzu ilə bağlı Sfera.az-a danışan narkoloq Asif Kəngərli bildirib ki, alkoqolizm ağır psixi xəstəlikdir. "Həmin xəstələrdə fiziki və psixi asılılıq olur. Bu şəxsləri birinci və ikinci mərhələdə evdə müalicə etmək olar. Alkoqol aludəsini müalicəyə məcbur etmək olmaz. Həkimlər adi geyimdə evlərə gedir və müalicə prosesində xəstənin daxili orqanları detoks olunaraq zəhərdən təmizlənir. Alkoqol aludəsi olanlar psixi asılılıqdan xilas olduqdan sonra psixoloqa müraciət etməlidir".

Həkim bildirib ki, xəstələrə əsasən içkidən iyrəndirən dərman verilməlidir. "İyrəndirici terapiyaya müalicənin 2-ci günü başlamaq lazımdır. Çünki xəstə tezliklə tarazlıqdan çıxa və yenidən içkiyə meyillənə bilər. Xəstə içkiyə meyilli olduqda içkinin miqdarına nəzarəti itirir. 100 qram araq belə beyində 1000 hüceyrəni öldürür".

Asif Kəngərli diqqətə çatdırıb ki, bəzi insanlar isə alkoqol aludəsi olan həyat yoldaşlarını, tanışlarını və qohumlarını müalicə etmək üçün həkimə müraciət etmirlər:

"İyrəndirici dərmanları aptekdən əldə edib gizli şəkildə həmin xəstələrin yeməyinə qatırlar. Belə olduqda həmin şəxs 30 qram spirtli içki içən kimi qızarır və qusma halları baş verir. Bu üsul isə müvəqqətidir. Bu halın üstü açıldıqda isə ailədaxili münaqişələr yaranır. Məhz bu baxımdan xəstə öz istəyi ilə müalicə olunmalıdır".

Ülkər Abdurahmanlı