Deputat məktəblərdəki kriminal hadisələrdən DANIŞDI: “Daha çox olacaq”
“Kriminal hadisələr cavanlaşır”.
Sfera.az bildirir ki, bunu Milli Məclisin Elm və təhsil komitəsinin üzvü Ceyhun Məmmədov Gəncədə məktəbdə törədilən qətl hadisəsi barədə danışarkən deyib. O qeyd edib ki, belə hadisələrin baş verməməsi üçün tədrislə tərbiyə işi paralel aparılmalıdır:
“Proseslərin təhlili onu göstərir ki, belə halların baş verməsi artan xətt üzrə davam edəcək. Bu gün gənclərdə kriminal aləmə meylin artması, onların daha çox kriminal əhval-ruhiyyəli mahnılara qulaq asmaları da bunu bir daha təsdiq edir. Bu barədə ciddi düşünməliyik. Əks halda, belə hadisələrin gələcəkdə daha çox baş verəcəyi ehtimalı yüksəkdir. Bəs belə hadisələrə görə kim məsuliyyət daşıyır? Hesab edirəm, məsuliyyət bütün tərəflərin üzərinə düşür. Ancaq daha çox məsuliyyəti məktəblərimiz daşıyır”.
Deputat qeyd edib ki, bu gün müxtəlif səbəblərdən valideynlər övladlarına kifayət qədər vaxt ayıra bilmirlər: “Digər bir məqam isə ondan ibarətdir ki, bəzi ailələr bu tərbiyəni vermək iqtidarında deyillər. Məsələnin ən ciddi tərəflərindən biri də budur. Belə olduğu halda isə yük daha çox məktəblər və müəllimlərin üzərinə düşür. Fikrimcə, təhsil sahəsində mövcud problemlərin araşdırılması üçün ayrıca bir mərkəzin fəaliyyətinə ciddi ehtiyac var. Əvvəl bu və ya digər formada bu funksiyanı Təhsil Problemləri İnstitutu yerinə yetirirdi. Sonradan iki qurum birləşdirildi və fəaliyyət daha çox başqa istiqamətə yönləndirildi”.
Günay
