"Cənab nazir, kömək edin"
Paytaxtın Qaraçuxur qəsəbəsində yerləşən "Binə” çörək
zavodunun sürücüləri yol terroru ilə məşğuldur
Qəsəbənin bir qrup sakini Politika.Az-a şikayətində
Bakı Şəhər Dövlət Yol Polis İdarəsinə (BŞDYPİ) müraciət edib.
Onların sözlərinə görə, BŞDYPİ təcili şəkildə bu
zavodun sürücülərini durdurmalıdır. Çörək zavodunun xidməti maşınları 927 nömrə
nişanı ilə hərəkət edir. Onlar Qaraçuxur ərazisində hər gün qəza riski yaradır.
Sürücülərin əksəriyyəti gənc şoferlərdir və onlar
darısqal, yöndəmsiz, çala-çuxur yollarda hər gün sükanı yüksək sürətlə, təhlükəli
idarə edirlər.
Sakinlər qeyd edirlər ki, yol polis əməkdaşları 1
saat reyd keçirməklə həmin sürücülərin yol hərəkətini necə kobud surətdə
pozduğunu görə bilər.
Müraciətdə bildirilir ki, məktəbdən çıxan şagirdlər
hər gün bu maşınların yol terrorunun təhlükəsi ilə üz-üzə qalır.
"Hörmətli Bakı dövlət yol polisindən xahişimiz
budur ki, "Binə” çörək zavodu sürücülərinə qarşı tədbir görülsün. Onlara görə
bir gün acı faciələr yaşayacağıq. Sürücülər nə darısqal yol görür, nə ehtiyatlı
sürmək bilir.
Bizim uşaqlar bunların ucbatından gedib-gələ
bilmir. Zavod rəhbərliyinin sürücü seçərkən hansı şərtlər irəli sürdüyü aydın
deyil. Onsuz da bu zavodun çörəyinin keyfiyyəti yoxdur. Üstəgəl, sürücüləri də
başımıza oyun açır”, - deyə şikayətdə qeyd olunur.
Qaraçuxur sakinləri həyəcan təbili çalır:"Cənab Ramil Usubov və Ramiz Zeynalovdan xahiş edirik
ki, təcili addım atılsın. Reyd keçirməklə hər bir mənzərə aydın olacaq.
Onların zavodu məktəblərə yaxın ərazidə yerləşir.
Hamısının nömrəsinin sonluğu 927-dir. Övladlarımızı qorumaq üçün sizə müraciət
etməkdən savayı yolumuz qalmadı”.
