Bayram günlərində maqnit qasırğası GÖZLƏNİLİR

Azərbaycanda dekabrın sonu və bayram günləri üçün kosmik hava proqnozu açıqlanıb.

Bu barədə Sfera.az-a BDU-nun Astrofizika kafedrasından məlumat verilib. Qeyd olunub ki, ötən günlərdə Günəşin fəallığı aşağı səviyyədə olub:

“Günəş diskində C sinfinə aid bir necə alışma baş versə də, geoeffektiv (Yerə yönələn) tac kütlə atılması müşahidə olunmayıb. Günəş küləyi parametrlərini ölçən DSCOVR peykindən əldə olunan görüntülər külək fonunun normal səviyyədə olduğunu deməyə əsas verir. 28 dekabr 2023 cü il - 03 yanvar 2024-cü il tarixlərində maqnit qasırğalarının gücünün ölçülməsində istifadə olunan Kp əmsalı 10 ballıq şkala (0-9) üzrə 2-4 intervalında dəyişəcək. Kiçik fasilələrlə fəal səviyyədə (Kp=4) olsa da, ümumən geomaqnit şəraitin sakit olacağı proqnozlaşdırılır. Orta en dairələrində geomaqnit qasırğanın baş vermə ehtimalı 1%-dən azdır”.

Qeyd olunub ki, maqnit qasırğası güclənə bilər: “Günəş fəallığının təsiri nəticəsində geomaqnit sahədə həyəcanlanmaların artması səbəbindən yarana bilən maqnit qasırğası Kp əmsalının 5-ə bərabər (G şkalası üzrə G1 səviyyə) qiymətindən başlayaraq maksimal 9-a qədər (G şkalası üzrə G5 səviyyə) güclənə bilər”.

Günay