İş yerlərində aidiyyatı üzrə tapşırıqların verilməməsi ilə bağlı şikayətlər atır. Digər ölkələrdə bununla bağlı qanunvericilikdə müəyyən tədbirlər nəzərdə tutulub.

Maraqlıdır, Azərbaycanda vəziyyət necədir? Çalışanlar bu cür tapşırıqları icra etməlidirmi?

Sfera.az-ın məlumatına görə, bununla bağlı fikirlərini bölüşən vəkil Vamiq Şükürov deyib ki, insanlar yalnız əmək müqaviləsində göstərilən və əmək funksiyasına, vəzifəsinə aid işləri görməlidirlər:

“Məsələn, kadrlar üzrə mütəxəssissiniz, sizə mühasibə aid olan işlər tapşırılır. Yaxud, mühafizə xidmətini icra edirsiniz, sizə təmizlik işlərini də həvalə edirlər və ya kassirsiniz, malları daşımaq barədə sizə göstərişlər verilir. Müəllimsiniz, uşaqların məktəb ərazisində olmasına nəzarət edilməsi sizə tapşırılır. Bu hallar qanunsuz hesab edilir. Yəni, siz yalnız əmək müqaviləsində göstərilən, əmək funksiyanıza və vəzifənizə aid işləri görməlisiniz. Əmək funksiyasından kənar işləri görmək sizin vəzifəniz deyil”.

Vəkil qeyd edib ki, sözügedən səbəbə görə işəgötürənlər min manatdan iki min manatadək məbləğdə cərimə edilə bilər:

“Bəzən işəgötürən əmək müqaviləsində işçinin görməli olduğu işlərə “digər işlərin görülməsi” bəndini də əlavə edir ki, sizə əmək funksiyanıza aid olmayan işləri görməyi tapşıra bilsin. Əslində bu, qanunsuz bənddir. Çünki hər bir işçi yalnız öz vəzifəsinə uyğun olaraq əmək funksiyasını yerinə yetirməlidir”.

Günay