"Trendyol" Azərbaycandan 1.3 milyon istifadəçisinin olduğu ilə bağlı açıqlama verib. “Trendyol” ilə rəqabət apara bilməyən yerli sahibkarlar isə batır.

Bəs elektron ticarət inkişaf edərkən yerli bazarı da ayaqda saxlamaq mümkün olacaqmı?

Məsələ ilə bağlı Sfera.az-a açıqlamasında texnobloqçu Fərid Pərdəşünas bildirib ki, Azərbaycanda sürətlə bağlanan pərakəndə satışla məşğul olan mağazaların "Trendyol" ilə rəqabət apara bilməmələrinin əsas səbəbi vergi və rüsumlardır:

“1.3 milyon istifadəçi çox ciddi rəqəmdir və o deməkdir ki, Azərbaycanda elektron ticarət 10 il gecikmə ilə formalaşdı. Amma çox böyük bir əmma yarandı. Bu daxili sifarişlər deyil. Hazırda çox sayda sahibkar dövlət orqanlarına şikayət məktubları yazır, mediada məsələni işıqlandırırlar. Sahibkar 36% gömrük rüsumu, gəlir vergisi və digər məcburi ödəmələri etdiyi halda vətəndaş ay ərzində 0%-lə 300$-ı keçməmək şərtilə məhsullar daha ucuza əldə edir”.

F.Pərdəşünas qeyd edib ki, 300$ limitinin azaldılması Türkiyə tekstili ilə rəqabət aparmaq üçün çıxış yolu deyil:

“Burada dövlətin üzərinə çox çətin bir məsuliyyət düşür. Çünki bir tərəfdə sahibkar batır, bir tərəfdə elektron ticarət inkişaf edir. Belə anda poçt daşımalarına tətbiq olunan limitin 300$-dan aşağı salınması məsələsi ilk ağıla gələndir. Amma düşünürəm ki, bu, qətiyyən olmalı deyil. Bu, çıxış yolu olmayacaq.

Dövlət burada sahibkarı qorumaq üçün xüsusi paketlər hazırlamalıdır. Yerli istehsalı təşviq edən nələrsə olmalıdır. Amma bu halda da yerli sahibkar türk sahibkarla rəqabət apara bilməyəcək. Türkiyə ilə tekstil sahəsində nəhəng ölkələr rəqabət apara bilmir”. 

Mütəxəssis sonda Çin mallarına marağın artıdığını da vurğulayıb:

“Sahibkar isə çıxış yolunu Çində görür. Hazırda "TikTok"da gördüyünüz çox ucuza satılan məhsullar Çindən kilo ilə alınan mallardır. Keyfiyyətsiz və təhlükəli”. 

Firuzə Əliyeva