Ölkəmizdə fırıldaqçıların, dələduzların sayı günü-gündən artır. Dələduzlar müxtəlif üsullarla insanların pulunu mənimsəyirlər. İnsanları aldadaraq pulunu mənimsəyən fırıldaqçıların bir çoxu işə düzəltmə şirkəti adı altında fəaliyyət göstərirlər.

Bəs, onların dələduz olduğunu necə anlamaq olar?

Mövzu ilə bağlı Sfera.az-a danışan sosioloq Əhməd Qəşəmoğlunun fikrincə, bu cür hallara qarşı ciddi cəza tədbirləri görülməlidir:

“Həmin şirkətlərə etibar etməzdən əvvəl vətəndaşlar onlar barədə ətraflı araşdırma edib məlumat toplamalıdırlar. Onlara gələn hər mesaja aldanıb pullarını köçürməməlidirlər. Hər bir şirkətin davranışı onun mahiyyəti barədə məlumat verir”.

Sosioloq qeyd edib ki, ciddi fəaliyyəti olmayan şirkətə inanmaq təhlükəlidir:

“Bu hallara yol verən şirkətlərin fəaliyyəti dayandırılmalı, əmlakı satılaraq aldadılan vətəndaşlara verilmədir”.

Hüquşünas Ramil Süleymanov isə bildirib ki, bu cinayət əməlidir.

“Cinayət Məcəlləsinin 178.2 maddəsinə əsasən bu cinayəti törədənlər 4000-7000 manata qədər cərimə oluna, 1 ildən 3 ilə qədər azadlığın məhdudlaşdırılması cəzasına məruz qala bilərlər”.

Hüquqşünas son olaraq əlavə edib ki, vətəndaşların telefonlarına gələn, mənbəyi məlum olmayan mesaj linkləridə təhlükə mənbəyidir.

Ülkər Abdurahmanlı