Məlum olduğu kimi, avqustun 7-dən nəqliyyat vasitələrinin parklanmasına görə ödənişlərin yığımı yalnız nağdsız qaydada, mobil tətbiq və SMS vasitəsilə həyata keçirilir. Sürücülər avtomobili park etdikdən dərhal sonra mobil tətbiqi açmalı və parklanmanın başladığını təsdiq etməlidirlər. SMS vasitəsilə ödəniş etmək istəyənlər isə parklanma başladıqda avtomobilin dövlət qeydiyyat nişanı, parklanma məntəqəsinin nömrəsi və parklanma yerini 1181 qısa nömrəsinə göndərməlidirlər. Əks halda sürücülərə qarşı cərimə tətbiq edilir. Yeni qanuna əsasən parklanma yerlərində “parkovşik”lərin dayanması qadağandır. 

Ümumiyyətlə, şəhər ərazisində, xüsusən də mərkəzi küçələrdə qanunsuz parkanlama edildiyini görürük. Bir yol boyunca 2-3 sıra avtomobil park edilir. Yol kənarında “dayanma-durma qadağandır” nişanı olsa belə, buna məhəl qoyulmur.

Eyni zamanda, hələ də parkinq əməkdaşları parklanma ərazilərində olur, sürücülərdən nağd ödəniş alır.

Fotoqrafımız İnşaatçılar metrosu, Qış parkı Nizami metrosu ətrafında bu halları lentə alıb.

Bəs oradakı “parkovşik”lər nazirliyin əməkdaşlarıdır, yoxsa qanunsuz dayanırlar?

Mövzu ilə bağlı Sfera.az Rabitə və Yüksək Texnologiyalar Nazirliyinə müraciət edib. Nazirliyin mətbuat xidmətinin əməkdaşı Pərvanə Əliyeva bildirib ki, nazirlik əməkdaşları qəti sürətdə sürücülərdən nağd ödəniş almırlar və məsələ ilə bağlı araşdırma aparılacaq.

Firuzə Əliyeva

Fotolar:Anar Bayramlı