Dörd illik fasilədən sonra... – Göyçaydakı Nar festivalından MARAQLI FOTOLAR
4 illik fasilədən sonra Göyçayda yenidən ənənəvi Nar festivalı keçirilib. Festivalda rayonun 30-a yaxın kəndinin nar və nar məhsullarından ibarət sərgi təşkil olunub.
Sfera.az-ın əməkdaşı da Şərqdə qədim zamanlardan “meyvələrin şahı” sayılan narın ölkəmizdəki vətəninə baş çəkib. Xatırladaq ki, nar festivalı ilk dəfə Mədəniyyət və Turizm Nazirliyi və Göyçay Rayon İcra Hakimiyyətinin təşəbbüsü ilə 3 noyabr 2006-cı ildə keçirilib. Bundan sonra festival ənənə halını alıb. Ənənəvi Nar festivalı və mədəniyyəti 2020-ci il dekabrın 16-da UNESCO-nun Bəşəriyyətin Qeyri-Maddi Mədəni İrsi üzrə Reprezentativ Siyahısına daxil edilib. Araşdırmalara görə, Göyçayda keçirilən ənənəvi Nar festivalı reytinqinə görə Müstəqil Dövlətlər Birliyi ölkələrində etnoqastronomiya bayramları və festivalları arasında ilk üçlüyə daxildir.
Builki festivala gəldikdə isə, ölkənin hər yerindən minlərlə insan Göyçaya axın etmişdi. Rayonda əsl izdiham yaşanırdı. Narla bağlı müxtəlif sərgilər, yarış və müsabiqələr təşkil olunmuşdu. Festival iştirakçılarına müxtəlif növdən olan dadlı narlar və onlardan hazırlanmış məhsullar təqdim edilirdi. Festivalda, həmçinin məktəblilərin əl işlərindən ibarət sərgi nümayiş olundu, göyçaylı qadınların ifasında folklor nümunələri səsləndirildi. Nar bayramı tanınmış müğənnilərin konsert proqramı ilə sona çatdı. Sonda isə atəşfəşanlıq oldu.
Festivala tur şəklində qatılan qonaqlar Göyçayın görməli yerləri ilə tanış olmaq imkanı da qazanıblar. Həmin məkanlardan biri olan Çərəkə gölü isə turistlərin diqqətini daha çox cəlb etmişdidi. Çətəkə gölü payız fəslinin ruhunu duymaq üçün gözəl məkanlardan biridir.
Qeyd edək ki, son üç ildə Göyçay rayonunda 3308 hektardan artıq yeni nar bağı salınıb, yeni istehsal müəssisələri fəaliyyətə başlayıb. Ötən il Göyçayda 50 min tondan artıq nar tədarük olunub. Nar festivalı isə pandemiya səbəbindən dörd il ertələnib.
Günay
Fotolar: Anar Bayramlı
