Azərbaycanda ilk dəfə keçirilən “Kibermüharibə” yarışı başa çatıb. Bir neçə ay davam edən yarışmada kritik qurumların, əsasən dövlət və özəl sektorun, bankların kiber komandaları, təmsil etdikləri qurumların kiber təhlükəsizliyini necə qoruyacaqlarını nümayiş etdiriblər.

Yarışmanın ötən həftənin sonunda baş tutan yekun mərhələsində  ilk üç yerin qalibləri SOCAR, Azercell və Prezidentin Təhlükəsizlik Xidmətinin kiber komandaları olub.

Maraqlıdır, hansı sektor daha güclü müdafiə olunur?

Sfera.az-ın məlumatına görə, bununla bağlı fikirlərini bölüşən Azərbaycan İnternet Forumunun rəhbəri Osman Gündüz deyib ki, “Azercell”in də dövlət şirkəti olduğu nəzərə alınarsa, ölkənin kiber sektorunda ən güclülər dövlət sektorundadır:

“Elə finalda yarışan 20 komandanın da yekun nəticələri bunu deməyə əsas verir. Ballara baxanda görünür ki,  dövlət sektoru daha üstündür. Özəl sektor, xüsusən banklar bu haqda ciddi düşünməlidirlər.

Ekspert qeyd edib ki, qərar qəbul edənlər, maraqlı tərəflər kibertəhlükəsizliklə və kritik infrastrukturla bağlı sahənin inkişafına, bu sahəyə resursların ayrılması və ondan effektiv istifadə məsələlərinə diqqəti artırmalıdırlar.

Türkan