“Red Bull Car Park Drift”in final mərhələsi keçirildi - FOTOLAR
Dünən “Red Bull Car Park Drift” təbdiri ikinci dəfə olaraq Bakıda keçirilib. Motorsport həvəskarları yenə də ən sürətli drift yarışında öz bacarıqlarını sınayıblar.
Sfera.az xəbər verir ki, yarış boyu iştirakçılar driftinq bacarıqlarını göstərməklə bərabər, “pendulum”, “spiral”, “gate”, “flipper” adlı maneələri də keçiblər.
Milli Finalçı adını qazanmaq istəyən iştirakçı “Red Bull Car Park Drift”də xüsusi hazırlanmış maneələrin öhdəsindən gəlməklə münsifləri heyrətləndirməli və 400 xal üstündən ən yüksək xalı toplamalıydı.
Bundan əlavə, drifterlər həm də maşınlarının görünüşü, səsi və təkərlərdən çıxan tüstünün həcminə görə də qiymətləndirilib.
“BOX” adlanan maneə isə iştirakçının taleyini həll edib. Çünki burada sürücülər maşınlarını dairəvi şəkildə döndürməli və maneələrlə dolu kiçik dördkünc çərçivənin ətrafında drift etməlidirlər. Əgər sürücülər fırlanaraq yanlış istiqamətə dönərlərsə və ya maneəyə dəyərlərsə xallar azalır. Üç penaltidən sonra isə oyundan kənarlaşdırılırlar.
Ən yüksək nəticəni əldə edib Milli Finalçı adını qazanan 99-NG-996 qeydiyyat nişanlı avtomobili idarə edən Niyaz Bədiyev olub. Nəticədə, o, ölkənin ən yaxşı drifteri seçilib və “Red Bull Car Park Drift”in Dünya Finalında Azərbaycanı təmsil edəcək.
Qeyd edək ki, yarışın xüsusi qonağı kimi Hiss ləqəbiylə tanınan müğənni Röya Məmmədova da tədbirdə iştirak edib. O, yeni trekini səsləndirib.
Firuzə Əliyeva
Fotolar: Anar Bayramlı
