Bir ailənin ərzaq və qeyri-ərzaq xərcləri 224 manat artıb

Azərbaycanda yaşayan əhali 2023-cü ildə mağazalarda hər ay adambaşına 440,1 manat pul xərcləyib. 

Sfera.az xəbər verir ki, xərclənən pulun 248,5 manatı ərzaq mallarının alınmasına, 191,6 manatı qeyri-ərzaq mallarının alınmasına sərf edilib. 

Qeyd edək ki, bu rəqəmlər ilin ilk 8 ayında əldə edilən nəticələrdir. Bu ilin nəticələrini ötən ilin eyni dövrünün nəticələri ilə müqayisədə görürük ki, Azərbaycanda yaşayan insanların ərzağa və qeyri-ərzağa xərclədiyi pul xeyli artıb. 

Ötən ilin yanvar-avqust dövründə hər ay mağazalarda adambaşına 384 manat, o cümlədən ərzağa 216,6 manat, qeyri-ərzağa 167,4 manat xərclənib. 

Müqayisə göstərir ki, insanların ticarət xərcləri adambaşına 56 manat, bir ailənin (4 nəfərlik) aylıq ticarət xərcləri 224 manat artıb. Artan aylıq adambaşına xərclərin 32 manatı ərzaq, 24 manatı qeyri-ərzaq xərclərinə görə yaranıb. 

Bu il xərclərin kəskin artmasının əsas səbəbi yüksək inflyasiya ilə bağlıdır. İlk 8 ayda ərzaq və qeyri-ərzaq xərclərində inflyasiya 12 faiz səviyyəsində olub. 

Vasif