Sosial şəbəkələrin çoxluğunu və həyatımıza nüfuz etməsini xəyanətlərin artmasına səbəb kimi göstərirlər. Eyni zamanda, kişilərin xəyanətə daha çox meyil etdiyi deyilir.

Maraqlıdır, xəyanət nədən qaynaqlanır?

Mövzu ilə bağlı Sfera.az-a açıqlama verən  psixoloq Aytən Ələkbərova bəzi hallarda qadınların xəyanəti düzgün qiymətləndirmədiyini deyir. Müsahibimiz bir insanın münasibəti olduğu halda, başqa birinə yönəlməsinin xəyanət olmaya biləcəyini düşünür:

“Əvvəla onu qeyd edim ki, xəyanət hər kəsin öz vicdanının ölçüsüdür. Belə ki, son dövrlər istər sosial şəbəkələr, istərsə də efirlərdə xəyanətlə bağlı müzakirə olunan mövzuların heç biri psixoloji fakt olmadan xəyanətə yol aça bilməz. Bir insanın digər biri ilə ruhunun birləşməməsi, yola getməməsi və başqa şəxsə yönəlməsi bəlkə heç xəyanət deyil? Bir insanı xəyanətə və boşanmaya aparacaq bir neçə faktor var. Bunların içərisində ilkin səbəblər kimi kişilərin həyat yoldaşı, ata olmamağa hazır olmaması, ailə üzvləri arasında qarşılıqlı xoş əlaqəni təmin edə bilməməsi dayanır. Bəzən cütlüklər evləndikdən bir il sonra boşanmağa qərar verirlər. Səbəb də o olur ki, xanım sosial şəbəkədən aktiv istifadə edir və həyat yoldaşı buna qarşı çıxır. Beləliklə, ailədə söz-söhbət yaranır və kişilər dərdini başqa biri ilə bölüşməyə başladıqda xanımlar bunun xəyanət olduğunu düşünür”.

Psixoloq kişilərin yenilik axtarışında olduqları üçün xəyanət yolunu seçməsindən də danışıb:

“Ər ola bilmək təkcə cinsi münasibətlər demək deyil. Elə hallar da olur ki, xanımların ana olmağa hazırlaşdıqları dövrdəki narahatlıqları bəyi sıxmağa başlayır. Bu da yenə söz-söhbətlərin yaranmasına gətirib çıxarır. Bundan başqa, uşaq dünyaya gəldikdən sonra bəylər unudulduğunu düşünərək başqa şəxsdən göstərilən şirin münasibətə aldanır və ailəsindən soyuyur. Bunlar bütün bəylərə şamil edilmir, lakin psixoloji fakt olaraq öz təsdiqini tapmış hallardır. Bəzən elə kişilər olur ki, seans zamanı bildirirlər ki, xəyanəti yenilik effekti almaq üçün ediblər və həmin qadınla daimi olmaq niyyətində deyillər. Bu zaman şəxs etdiyi hərəkətə şərh verməyə başlayır. Xəyanət çox geniş mövzudur və müxtəlif situasiyalar buna gətirib çıxara bilir”.

İnci