Gürcüstan parlamentində azərbaycanlıların problemləri müzakirəyə çıxarılacaq - FOTO
Gürcüstanın energetika məsələləri üzrə ombudsmanı Salome Vardiaşvili azərbaycanlıların kompakt
yaşadığı Marneuli rayonuna səfər edib.
Sfera.az xəbər verir ki, APA-nın məlumatına görə, S.Vardiaşvili yerli əhali ilə görüşüb, vətəndaşların
enerji, su və qaz təchizatı sahəsi ilə bağlı problemləri ilə maraqlanıb.
Görüşdə iştirak edən soydaşlarımız bürokratik əngəllərlə rastlaşdıqlarını, buna görə də hələ də bir
çox kəndlərə təbii qaz verilmədiyini bildiriblər. Həmçinin Marneuli su idarəsinin əhalini keyfiyyətli su
ilə təmin etmədiyi vurğulanıb. S. Vardiaşviliyə Azərbaycan və Ermənistanla həmsərhəd bölgələrdə
yerləşən kəndlərə elektrik enerjisinin verilməsində yaranan problemlərə dair suallar da ünvanlanıb.
Sualları cavablandıran ombudsman görüşdə qeyd olunan problemlərin həlli üçün müvafiq qurumlara
sorğu göndəriləcəyini bildirib. Eyni zamanda qeyd edib ki, səslənən sualların əksəriyyəti Gürcüstan
parlamentinə seçilən azərbaycanlı deputatlara ünvanlanmalıdır. O gələcəkdə bölgədə keçiriləcək
görüşlərə onları da dəvət edəcəyini deyib.
S.Vardiaşvili azərbaycanlıların kompakt yaşadığı bölgənin problemlərini martda parlamentdə çıxışı
zamanı səsləndirəcəyini də bildirib.
