Bu gündən etibarən Azərbaycanda bütün siqaretlərin qiyməti bahalaşıb. Pərakəndə satış məntəqələrindən bildirilib ki, siqaretlərin qiyməti firmalar tərəfindən qaldırılıb. Belə ki, bəzi siqaretlərin qiymətində 10, bəzilərində isə 20 qəpik bahalaşma müşahidə olunur.

Sfera.az xəbər verir ki, bahalaşma ilə əlaqədar danışan iqtisadçı-ekspert Eldəniz Əmirov qiymət artımının siqaret istifadəçilərinin sayını azaldacağını deyib:

"Siqaretin qiymətinin qalxması onun istifadəçilərinin sayının azaldır. Bunu DSK və ÜST hesabatları da təsdiqləyir. Hazırda isə bu qiymət artımının xüsusi və qeyri-adi bir səbəbi yoxdur. Səbəb sadədir - infilyasiya.

Sadəcə olaraq, 528 məhsulun əksəriyyətinin qiyməti gündəlik və ya həftəlik bir-iki qəpik artığı üçün nəzərə az çarpır. Amma siqaretin qiyməti dövlət tərəfindən tənzimlənməsə də, onun artımı gündəlik və ya həftəlik olmur. Bir müddət daşlaşmış qiymət olur, tərpənməz qalır. Hər 4-5 aydan bir 10 -20 qəpik artır. Bu isə bugünkü rezonansı verir. Çünki həyat üçün ən lazımsız olan siqaret öz aludəçisini əsir saxlayır. Qiymətlərin hansı ayda və nə qədər qalxması isə bu sahədəki subyektlərin davranışından asılıdır. Amma illik nəticədə siqaret qiymətlərindəki artım hər zaman ərzaq infilyasından az, qeyri-ərzaq infilyasiyasından çox olur. Bu il də belə olacağı şübhəsizdir".

Ekspert tütün və tütün məhsullarına görə bizə gələn gəlirdən çox vəsaitin ölkədən çıxdığını qeyd edib:

"İl ərzində Azərbaycandan təxminən 16 milyon dollardan çox ABŞ dolları dəyərində tütün və tütünün sənaye əvəzediciləri ixrac olunub. Konkret siqaretin özünə gəldikdə isə Dövlət Statistika Komitəsinin məlumatına görə, 2022-ci ildə Azərbaycandan 4,8 milyon dollar dəyərində 634 milyon ədəd siqaret ixrac edilib. Amma tütün və tütünün sənaye əvəzedicilərinin idxalına isə 91 milyon ABŞ dolları dəyərində pul xərcləmişik. Yəni tütün və tütün məhsullarına görə bizə gələn gəlirdən 70-75 milyon dollar çox ölkədən vəsait çıxır".

Əzizə

“Bahalaşma siqaret istifadəçilərinin sayını azaldacaq” - İqtisadçı