Göyçay RİH sosial şəbəkələrdə yayılmış yalan məlumatlara aydınlıq gətirdi
Göyçay Rayon İcra Hakimiyyəti sosial şəbəkələrdə yayılmış saxta paylaşımlarla bağlı məlumat yayıb.
Sfera.az xəbər verir ki, Göyçay RİH-in məlumatında sosial şəbəkələrdə rayon sakini Elnur Rəhimlinin ticarət köşkü ətrafında baş verənlərlə bağlı aşağıdakılar bildirilib:
“E.Rəhimli rayon İcra Hakimiyyətinin Başçısı tərəfindən qəbul edilmiş və şəhid qardaşı olması nəzərə alınaraq ona qanunsuz quraşdırdığı köşkün digər əraziyə köçürülməsi təklif edilmişdir. Lakin E.Rəhimli həmin təklifdən imtina etmişdir.
Sosial şəbəkələrdə həmin mövzuda olan məlumatlar qərəzli olmaqla rayonda aparılan abadlıq-quruculuq və yenidənqurma işlərinə kölgə salmaq niyyəti daşıyır.
Paylaşımda göstərdiyiniz ərazidə qanunamüvafiq qaydada Rayon İcra Hakimiyyəti tərəfindən keçirilmiş müsabiqə əsasında sakinlərin mədəni istirahəti və iş yerlərinin yaradılması üçün müasir üslubda yüngül konstruksiyalardan ibarət layihəyə uyğun olaraq sahibkar tərəfindən ictimai iaşə obyektinin quraşdırılması və ətraf ərazininin abadlaşdırılması işlərinə başlanılmışdır.
Sahibkarlığın inkişafı üçün rayonda əvvəlki illərdən fərqli olaraq tam şəffaf şərait yaradılmışdır.
Bu sahədə mövcud qanunvericiliyə zidd hallar aşkar olunduqda hüquq-mühafizə orqanlarına müraciət oluna bilər”.
