Avropa Birliyinin Erasmus+KA1 mübadilə proqramı çərçivəsində Azərbaycan Könüllülər İctimai Birliyinin təşkilati dəstəyi ilə Bakı şəhərində “Smart youth for smart cities” adlı beynəlxalq layihə keçirilir.

Sfera.az xəbər verir ki, layihədə 8 ölkədən (Azərbaycan, Estoniya, Gürcüstan, Fransa, İtaliya, Polşa, Niderland və Türkiyə) hər birindən 4 nəfər olmaqla, ümumilikdə 32 nəfər QHT rəhbəri və üzvləri iştirak edir.

28 may 2023-cü il tarixinə qədər davam edəcək layihənin məqsədi gənclərə BMT-nin Dayanıqlı İnkişaf Məqsədlərinin (DİM) həyata keçirilməsində yol göstərmək, ağıllı şəhər fenomenini araşdırmaq, ağıllı şəhərlərin ideyalarını təbliğ etmək üçün müxtəlif vasitələrdən istifadə bacarıqlarını aşılamaqdan ibarətdir.

Layihə müddətində qeyri-formal təhsil metodundan istifadə olunaraq iştirakçılara DİM-lər haqqında məlumat verməklə yanaşı, müvafiq hədəflərə çatmaq və daha az imkanları olan gənclərin işləmək bacarığını inkişaf etdirmək, AB Proqramı və Tərəfdaş ölkələrlə gənclərlə iş sahəsində əməkdaşlığı genişləndirməkdir.

Tədbir çərçivəsində iştirakçı ölkələrin mətbəxi, milli musiqisi və rəqs nümunələri nümayiş olunmuşdur.