“Müvafiq qurumlar hərəkətə keçməlidir...” - Açıqlama

Xəbər verdiyimiz kimi, paytaxtda iki azyaşlı quyuya düşərək ölüb. Ümumiyyətlə paytaxtın bir sıra küçələrində insan sağlamlığı üçün təhlükə yarada biləcək tikinti xətalarının, yolda çuxurların olmasına şahidlik edirik.

Maraqlıdır, bu kimi problemlərin qarşısının alınması üçün hansı addımlar atılmalıdır?

Mövzu ilə bağlı Sfera.az-a açıqlama verən təhlükəsizlik məsələləri üzrə ekspert Elmar Nurəliyev bəzi hallarda insanların məsuliyyətsizliyinin ağır fəsadlara gətirib çıxardığını deyib:

“Gözləmək lazım deyil ki, hansısa bədbəxt hadisə yaşansın, ondan sonra tədbir görülsün. Tikintini aparan şirkət, özəl və ya dövlət müəssisəsi ərazidə olan riski vaxtında təhlükəsiz hala gətirməlidir. İki azyaşlının quyuya düşərək ölməsi çox ağır hadisədir, belə bir ehtimalı əvvəlcədən gözə almaq lazım idi. Əgər həmin quyunun üzəri açıqdırsa, bu quyuya hətta gündüz vaxtı yaşlı insan da düşə bilər. Bu kimi təhlükələrə yol çöküntülərini, aşma təhlükəsi olan dirəkləri, yaxud kanalizasiya quyularını nümunə göstərə bilərik. Bu kimi təhlükələr eyni ərazilərdə bəzən illərlə aradan qaldırılmır. Hadisə isə bir dəfə olur”.

Ekspert insanları təhlükələrlə bağlı müvafiq qurumlara müraciət etməyə səsləyib:

“Bu cür hadisələrin yaşanmaması üçün aidiyyatı qurumlar hərəkətə keçməlidir. Bundan başqa valideynlər də uşaqların oynadıqları, zaman keçirdikləri əraziləri nəzərdən keçirməlidirlər.  Yaxud, uşaqlara belə riskli halları gördükləri zaman etməli olduqları olduqları davranışlar aşılanmalıdır. Ani bir diqqətsizlik sonradan bədbəxt hadisələrin yaşanmasına gətirib çıxarır. Hər bir şəxsin belə situasiyalara qarşı vaxtında tədbir görülüməsi üçün müvafiq qurumlara müraciət etməyi gərəklidir”.

Əzizə Zeynal