Xəbər verdiyimiz kimi, Formula 1 Azərbaycan Qran-Prisi 2026-cı ilədək F1 təqviminə əlavə olunub. Yeni qərar isə öz növbəsində geniş müzakirələrə səbəb olub. Yarışın ölkədə keçirilməsini dəstəkləyənlər olsa da, böyük əksəriyyət yeni qərara mənfi reaksiya verib.

Mövzu ilə bağlı Sfera.az-a açıqlama verən millət vəkili Vüqar İskəndərov Formula 1 oyunlarının ölkəmizin dünyada tanıdılması üçün mühüm vasitə olduğunu deyib:

“Formula 1 dünyada futboldan sonra ikinci ən çox tamaşaçı cəlb edən idman yarışmasıdır. Bu yarışı hər ölkə öz üzərinə götürüb keçirə bilmir. Əvvəla, bu məsələdə yüksək təşkilatçılıq, infrastruktur, maliyyə lazımdır. Yarış keçirilən ölkədə sabitlik olmalıdır. Bir məsələni nəzərdən qaçırmayaq ki, yarış günlərində 1 milyarda yaxın insan Azərbaycanı izləyir. Təsadüfi deyil ki, həmin günlərdə “Google” axtarış sistemində ən çox axtarılan sözlər “Azərbaycan”, “Bakı” sözləri olur. Bu, çox önəmli məsələdir. Koronavirus pandemiyasının başlamasından əvvəl yarışların keçirilməsi ölkəmizə turist axınının çoxalması ilə nəticlənmişdi. Daha sonra pandemiya səbəbindən sərhədlərin bağlanması, yarışların keçirilməməsi turizmə mane oldu. Lakin pandemiyadan sonra bu yarışlara start verilməsi ilə artıq ölkəmizə turist axınının bərpasını müşahidə edirik”.

V.İskəndərov vətəndaşları yarış müddətində anlayışlı olmağa çağırıb:

“Bir ölkənin  dünyada tanınması onun sözünün kəsərini artırır, dövlətin gücünü nümayiş etdirir. Bu, vacib strateji məsələdir. Yarışların keçirildiyi müddətdə yolların bağlanması vətəndaşlar üçün çətinlik törədir, amma buna dar pəncərədən yox, geniş vizyondan baxmaq lazımdır. Dünya ulduzlarının ölkəmizə gəlməsi, xoş sözlər söyləməsinə Azərbaycanın dünyaya təqdimatı kimi də baxılmalıdır. Ona görə də insanlarımız yarışın yaratdığı çətinliyi anlayışla qarşılamalıdırlar. Hər bir azərbaycanlı bu yarışı keçirən ölkənin vətəndaşı olduğu üçün qürur duymalıdır”.

Əzizə Zeynal