Azərbaycanda niyə ancaq 5 ulduzlu hotellər tikilir? - AÇIQLAMA
Xaricilərin Azərbaycan hotellərində gecələmələrində artım qeydə alınıb. Belə ki, bu say 79.7 faiz artaraq 309 minə çatıb. Bu barədə Dövlət Statistika Komitəsi məlumat yayıb.
Qeyd olunub ki, göstərilən rəqəmlərin 80 faizi Bakının payına düşür. Azərbaycana gələn xaricilərin 8,9 faizi Qusarda, 3,5 faizi Naftalanda, 3,2 faizi Qəbələdə, 1,8 faizi Qubada, 0,4 faizi Naxçıvan Muxtar Respublikasında, 0,3 faizi Şabranda, 1,8 faizi isə digər şəhər və rayonlardakı hotellərə üstünlük veriblər. Yəni Azərbaycanda gecələyən hər 100 xaricinin yalnız 20-si bölgələrə üz tutub.
Sfera.az-ın məlumatına görə, bununla bağlı fikirlərini bölüşən deputat Vüqar Bayramov deyib ki, hələ də regionlarla müqayisədə Bakı xaricilər üçün daha cəlbedicidir:
“2023-ci ilin ilk rübündə ölkəmizə gələn turistlərin sayında artım müşahidə olunsa da, daha qısa zamanda pre-pandemiya göstəricilərinə çatmaq hədəflənməlidir. Eyni zamanda, regionlarda çoxulduzlu hotellərlə bərabər, 1 və 2 ulduzlu hotellərin tikilməsi oludqca vacibdir. Belə hotellərin qiyməti daha aşağı olur və çox turistlər cəlb edir”.
İqtisadçı qeyd edib ki, bu gün ölkəmizdə sahibkarlar daha çox 4-5-ulduzlu, bahalı hotellərin tikintisinə maraq göstərirlər: “Az ulduzlu hotellərin inşaatının sürətləndirilməsi bu istiqamətə daha çox aşağı faizli kreditlərin ayrılması və güzəştlərin tətbiqini aktuallaşdırır. Bu, sahibkarların stimullaşdırılması baxımdan vacibdir”.
Günay Rəsulqızı