“5 ulduzlu otellərin hamısı dolub” – Ekspert səbəbləri AÇIQLADI
“Formula 1 yarışlarına görə paytaxta həm azarkeşlər, həm də turistlərin axını olur. Bir çox hallarda Bakıya gələn turistlərin regionlara üz tutması da baş verir”.
Bunu Sfera.az-a açıqlamasında “DAİR” Otellər və Restoranlar Assosiasiyası İdarə Heyətinin sədri Samir Dübəndi deyib.
Müsahibimiz qeyd edib ki, tələb artdığına görə otellərin qiymətlərində də artım müşahidə edilir:
“O cümlədən, otellərdə yerlər azalır. Otellərlə yanaşı, qısamüddətli icarəyə verilən mənzillərin qiymətlərində də bahalaşma qeydə alınır. Bu isə təbii prosesdir. İrimiqyaslı tədbirlərin keçirilməsi zamanı hər hansı turizm destinasiyasında qiymətlər nisbətən artır. Tələb və təklif arasındakı qanunauyğunluq buna gətirib çıxarır”.
Ekspert bildirib ki, qiymət artımlarına təəccüblənmək lazım deyil: “Təxmini statistikaya əsasən, Bakı şəhərində fəaliyyət göstərən iri, mərkəzdə yerləşən 5 ulduzlu otellərin bu gün demək olar ki, satışa çıxarılası yerləri yoxdur. Yəni tam doludurlar. Digər kateqoriyalara aid olan, mərkəzdə yerləşən yerlərin də 70-80 faizi artıq tutulub. Bu da hazırkı mövsüm üçün yüksək hesab oluna bilər. Təbii ki, sözügedən prosesə səbəb Formula 1 yarışlarıdır”.
Qeyd edək ki, sabah Bakıda “Formula-1” üzrə Azərbaycan Qran-prisi başlayacaq.
Günay Rəsulqızı