“Ramazanda yerinə yetirilməli əməllərdən biri də fitrə zəkatıdır. Hər bir şəxsin imkanından asılı olaraq bu məbləğ 5-15 manat arası dəyişə bilər”.

Sfera.az bildirir ki, bunu Milli Məclisin ictimai birliklər və dini qurumlar komitəsinin üzvü Ceyhun Məmmədov deyib.

O qeyd edib ki, fitrə zəkatı verilən ərzaqın dəyərindən asılıdır:

“Fitrə zəkatını buğdanın qiyməti ilə hesablasanız, məbləğ daha aşağı, xurma və ya düyü ilə hesablasanız, daha baha olacaq. Çünki hər üç ərzaq növü arasında qiymət fərqi var.  Fitrə zəkatı ərzaqla verilməlidir, yoxsa ərzaqın dəyərində pul da verilə bilər məsələsinə gəldikdə isə, bəzi islam alimləri fitrə zəkatının mütləq ərzaqla verilməsinin vacibliyini vurğulayırlar.  Müasir dövrün ehtiyaclarını nəzərə alaraq, bir sıra islam alimləri isə ərzaq dəyərində pulun verilməsinin mümkünlüyünü bildirirlər”.

Millət vəkili deyib ki, fitrə zəkatı verilən insan nəyə ehtiyacının olduğunu bildiyi üçün həmin pulla özü istədiyi ərzaqı və ya başqa ehtiyacı olan əşyanı ala bilər: “İmkanı olan hər bir şəxsin fitrə zəkatını verməsi vacibdir. Fitrə zəkatı mütləq imkansız və kimsəsiz insanlara verilməlidir. Ramazanın sonuncu gününə, ən geci bayram namazına kimi fitrə zəkatı verilməlidir”.

Türkan