“Azərsu” qənaət rejiminə keçib, Azərbaycanda su qıtlığı təhlükəsi var? - AÇIQLAMA
![“Azərsu” qənaət rejiminə keçib, Azərbaycanda su qıtlığı təhlükəsi var? - AÇIQLAMA](https://sfera.az/photo/orginal/2023/03/01/1677668806_su-krant2.jpg)
Fevral ayından etibarən Bakıətrafı ərazilərə içməli suyun verilməsi qrafikində dəyişiklik edilib. Bakının Suraxanı, Sabunçu, Binəqədi rayonları, habelə Abşeron və digər ətraf ərazilərdə qrafik 14 saat əvəzinə 10 saata salınıb. Eyni zamanda, hansı ərazidə 12 saat su verilirsə, bu qrafik 8 saata endirilib.Bu isə öz növbəsində istifadəçilərin narazaılığına səbəb olub.
Maraqlıdır, “Azərsu” tərəfindən tətbiq edilən suya qənaət rejimi nə dərəcə effektivdir? Yeni sistem su ehtiyatlarına ciddi mənada təsir göstərə biləcəkmi?
Məsələ ilə bağlı Sfera.az-a açıqlama verən Milli Hidrometeorologiya Xidmətinin rəis müavini Rafiq Verdiyev ölkədə bir sıra çaylarda su ehtiyatının azaldığını deyib:
"İqlim dəyişmələrinin təsiri nəticəsində son illərdə Samur çayında, eyni zamanda , Kür, Araz, Qanıx çaylarında su ehtiyyatları azalıb. Əlbəttə ki, bu da su təchizatında problemlər yaradır. Bu problemləri həm suvarmada, həm də içməli su təchizatında müşahidə edə bilirik. Samur çayında suyun azalması Bakı və Abşeron üçün götürülən su ehtiyatının azalmasına, “Taxtakörpü” su anbarının doldurulmasında çətinlik yaradıb. Suya qənaət məqsədilə fasilələrin tətbiq edilməsi tək bizim ölkədə deyil. Bu rejim Avropa ölkələrində də keçən il həyata keçirilib”.
Müsahibimiz tədricən çaylarda sululuğun daha çox azalacağını qeyd edib:
“İqlim dəyişikliyi nəticəsində sululuğun azalması davam edə bilər. Ona görə də sudan daha səmərəli istifadə etmək lazımdır, çalışmaq lazımdır ki, su ehtiyatlarından məqsədyönlü istifadə edilsin ki, bu sahədə problem yaranmasın”.
Əzizə Zeynal