Bir neçə gün öncə Türkiyədə baş vermiş dəhşətli zəlzələ ölkəmizdə də təhlükə xofu yaradıb. Əksər insanlar baş vermiş fəlakətin bizim ölkədə də təkrarlanacağından narahatlıq keçirir.

Məsələ ilə bağlı Sfera.az-a açıqlama verən psixoloq Aytən Ələkbərova zəlzələ ilə bağlı narahatlığın zamanla ruhi pozuntuya yol aça biləcəyini deyib:

“Bütün xəstəliklərin başında qorxu dayanır. Qorxu və təşvişin nəticəsində nervoloji və psixoloji problemlər meydana çıxır. Bu kimi hallara vaxtında müdaxilə olunmayanda fəsadlar get-gedə böyüməyə başlayır. Lakin qonşu ölkədə zəlzələnin olması o demək deyil ki, eyni hadisə bizdə də yaşanacaq”.

Psixoloq bəzilərinin heyvanların davranışlarını izləyərək panikada olduğunu deyib:

“Ən yaxın Şərq ölkələrinin tarixini və coğrafiyasını dərindən öyrənmişəm. Coğrafiyanı dərin bildiyimə görə deyə bilirəm ki, bizim torpaqlarımızda qoruma var. Ümidvaram ki, belə zəlzələlər bizdə olmayacaq. İnsanlar informativ stressi özlərinə çəkib neqativ enerjini qəbul etməsinlər. Bu gün seanslarda bir neçə nəfər mənə evində saxladığı pişiyi nəzarətdə saxladığını deyib. Onlar düşünür ki, itin ulaması, pişiyin narahatlığı zəlzələdən xəbər verə bilər. Deməli, artıq insanlarda bu qorxu yaranıb ki, ev heyvanlarına belə yanaşırlar”.

Əzizə Zeynal