Messi Natiq Cəfərlini necə işə saldı? - “Bu da onun mənə xeyri...”

REAL partiyasının icraçı katibi, tanınmış iqtisadi ekspert Natiq Cəfərli ötən gecə maşınını itirib.

Sfera.az bildirir ki, bu barədə iqtisadçı özü məlumat paylaşıb. O, hadisənin dünya çempionatına baxdığı zaman baş verdiyini deyib:

“Oyun bitdi, ayıq sürücü çağırdım, 1-2 bokal pivə içmişdik. Sürücü ilə maşını saxladığım yerə çatdıq, maşın yoxdur. Orada olan "stoyanşikdən" soruşdum, dedi ki, yəqin "ştrafnoya" aparıblar. "102"-yə zəng edib şikayət etdim, çünki o küçədə saxlamağı qadağan edən işərə yoxdur. Heç 3 dəqiqə keçməmiş polisdən zəng gəldi, çox ədəblə məsələni soruşdular, danışdım, dedim ki, yaxınlıqdakı bölməyə və cərimə meydançasına gedirik. Operativ şəkildə polis maşını, 3 əməkdaş ayırdılar, gəldik cərimə meydançasına - maşın orda da yoxdur. Polislər tez digər dayanacaqlarla, YPX əməkdaşları ilə əlaqə saxladılar - maşından xəbər yox. Düşündüm ki, maşını oğurlayıblar, bu da Messinin mənə xeyri.. Bəlli oldu ki, maşın o biri, paralel küçədədir”.

N.Cəfərli etiraf edib ki, dünənki futbol həyəcanına görə maşının yerini unudub: “Polislərdən onları məşğul etdiyimiz üçün üzr istəyib ayıq sürücü ilə evə gəldik. Bir sözlə, möhtəşəm, maraqlı, yaddaqalan final yaşadıq”.

Türkan