Sabah Vasif Talıbovun Naxçıvan Muxtar Respublikasının Ali Məclisinin sədri təyin edilməsinin 27 illiyi tamam olur.

Sfera.az xəbər verir ki, Vasif Talıbov bu vəzifəyə 1995-ci ildə Namiq Həsənovun yerinə seçilib. Naxçıvan MR Azərbaycanın hüquq sistemi çərçivəsində idarə edilsə də, buradakı idarəetmə forması barədə ictimaiyyət o qədər də məlumatlı deyil. Son günlərdə Muxtar Respublikada keçirilən əməliyyatlar çərçivəsində müxtəlif vəzifəli şəxslərin saxlanılması da, bu məsələni gündəmə gətirib. Naxçıvan MR-nın Ali Məclisinin və Nazirlər Kabinetinin saytında bu qurumların rəhbər şəxsləri barədə məlumatlar demək olar ki, yoxdur.

Belə ki, Naxçıvan MR-nın saytında yalnız baş nazir Səbuhi Məmmədov və baş nazirin birinci müavini Elşad Əliyevin adları qeyd olunub. Kabinetə daxil olan nazirliklərin rəhbər şəxsləri, eləcə də digər müavinlər barədə rəsmi mənbələrdə məlumatlara rast gəlmək mümkün deyil. Azərbaycan Respublikasının Nazirlər Kabinetinin saytında isə kabinet üzvlərinin (nazirlər, dövlət komitələri və dövlət xidmətlərinin rəhbərləri) adları ardıcıllıqla qeyd edilib.

Maraqlıdır ki, Naxçıvan Nazirlər Kabinetinin saytında yayımlanan rəsmi xəbərlərdə də Talıbovun nazirlərlə kollektiv şəklini tapmaq olmur, bütün müşavirələr təkcə Ali Məclisin Sədrinin şəkliylə yayımlanıb.

Naxçıvan MR-nın Nazirlər Kabinetinin internet resursunda yalnız aparatın məsul şəxslərinin qəbul günləri bölməsində buraya daxil olan şöbələrin müdirlərinin adını tapmaq olar. Buradan məlum olur ki, Naxçıvan Nazirlər Kabinetində aşağıdakı şöbələr var:

Aqrar məsələlər və ekologi̇ya şöbəsi - Mübari̇z Bayramov (şöbə müdiri)

Humani̇tar və sosi̇al məsələlər şöbəsi̇ - Sevi̇nc Cabbarova (şöbə müdiri)

İqti̇sadi̇yyat şöbəsi - Zahi̇d Qənbərov (şöbə müdiri)

Hüquq şöbəsi - Gülçi̇n Dünyamaliyev (şöbə müdiri)

Aparat - Aləm Bağırov (aparat rəhbəri)̇

Ti̇ki̇nti̇, sənaye və energeti̇ka şöbəsi - Ni̇had Qurbanov (şöbə müdiri)

Ümumi̇ şöbə - Fəri̇d Babayev (şöbə müdiri)̇

Naxçıvan MR-in Nazirlər Kabineti Naxçıvan Ali Məclisi qarşısında hesabat verir. Muxtar Respublikada ən yüksək qurum Ali Məclisdir.

Qeyd edək ki, son bir ayda Bakıdan Naxçıvana getmiş xüsusi əməliyyat-istintaq qrupunun həyata keçirdiyi əməliyyatlar nəticəsində Naxçıvan Gömrük Komitəsinin Gömrük tariflərinin tənzimlənməsi və ödənişlər şöbəsinin rəisi Mənsur Əsgərov, eləcə də Naxçıvanın maliyyə naziri Rafael Əliyev və Şəhərsalma və Arxitektura Komitəsinin sədri Hicran Rüstəmov həbs edilib.

Bu proseslərin fonunda əvvəlki illərdə həbs edilən və Naxçıvan MR Ali Məclisinin sədri Vasif Talıbovla münasibətlərinin yaxşı olmadığı bildirilən Naxçıvanın milli təhlükəsizlik naziri olmuş Vəli Ələsgərov məhkəmənin qərarı ilə cəza müddəti başa çatmadan azadlığa buraxılıb, sabiq daxili işlər naziri Əhməd Əhmədov isə həbsxanadan xəstəxanaya köçürülüb.

Xatırladaq ki, bu gün isə mediada Vasif Talıbovun uzunmüddətli məzuniyyətə göndərildiyi barədə məlumat yayılıb. (Qafqazinfo)

Naxçıvanda nazirlərin adları niyə gizlədilir?