Tural Abbaslıdan Əlisa Nicatla bağlı AÇIQLAMA
Bir neçə gündür sosial mediada əsas müzakirə mövzusu yazıçı Əlisa Nicatın durumu ilə bağlıdır. Yaşayış şəraitinin qənaətbəxş olmaması, kommunal xərcləri ödəməkdə çətinlik çəkməsi bir sıra tanınmış şəxslər tərəfindən reaksiyalara səbəb olub.
Ümumiyyətlə, dövlət yazıçılar və tanınmış simalarla bağlı hansı dəstəkləyici təbdirlər həyata keçirməlidir? Bu kateqoriyadan olan insanlara hansı güzəştlər nəzərdə tutulmalıdır?
Sfera.az-a danışan AĞ partiya sədri Tural Abbaslı Əlisa Nicatla bağlı məsələni izlədiyini bildirib:
“İstənilən halda, həm dövlət , həm də cəmiyyət olaraq ziyalılarımıza sahib çıxmalıyıq. Hər şeyi də kapitalizmə bağlamaq düzgün deyil. “21-ci əsrdir, sərbəst bazar iqtisadiyyatıdır, azad rəqabət dövrüdür” kimi bəhanələrimiz olmamalıdır. Çünki çox vaxt aydınlarımız kapitalizmin qaydaları ilə işləməyi bacarmırlar. Onların işi əsər yazmaq, yaratmaq, xalqı aydınlatmaqdır. Ona görə də ziyalılara, yazarlara, elm adamlarına dövlətin daim yardım etməli olduğunu düşünürəm”.
Müsahibimiz qeyd edib ki, Sovet İttifaqı kimi mürtəce bir iqtidar belə öz dönəmində yazıçıları, müəllimləri, alimləri himayə altına alıb, müxtəlif problemlərini həll etməyə çalışıb:
“Bu, dövlətdən elə də böyük xərc tələb etmir. Cüzi vəsaitlə yüzlərlə ziyalımızı, alimlərimizi təmin etmək mümkündür. Onlar məişət qayğıları, qaz pulu, işıq pulu, qidalanma, geyim dərdi çəkməməlidirlər. Onların işi yazıb yaratmaq, araşdırmaq olmalıdır. Bir dövlət özünün alimləri ilə tanınır. Odur ki, biz də yazarlarımıza, şairlərimizə sahib çıxmalıyıq. Bununla bağlı qanunvericilikdə də boşluqlar var. Düşünürəm ki, bu istimətdə xüsusi proqram qəbul edilməlidir”.
Günay Rəsulqızı
