"Baku Steel Company"nin keçmiş rəhbəri Rasim Məmmədovun cinayət işi üzrə keçirilən növbəti məhkəmə prosesində üzərinə həbs qoyulan 70 milyon manat dəyərindəki əmlakların tam siyahısı və onların hər birinin orta bazar qiyməti elan edilib.

Üzərinə həbs qoyulan ən bahalı əmlak Sumqayıt şəhəri, Kimyaçılar qəsəbəsində yerləşən şirkətin avadanlıqları və torpaq sahəsidir. Onun dəyəri 30 milyon 800 min manat həcmində qiymətləndirilib.

Digər əmlaklar arasında Xəzər rayonu, Mərdəkan qəsəbəsində yerləşən 550 min manatlıq iki bağ evi, Sabunçu rayonunda yerləşən 120 min manatlıq iki mağaza, Yasamal rayonu, Şərifzadə küçəsində 2 milyon manatlıq qeyri-yaşayış sahəsi də var.

Üzərinə həbs qoyulan bahalı əmlaklardan biri isə Səbail rayonu, Badamdar qəsəbəsində yerləşən Bakı Oksford Məktəbidir. Dəyəri 22 milyon 487 min 150 manat qiymətləndirilən məktəbin təsisçilərindən biri R.Məmmədovun həyat yoldaşı Mehriban Məmmədovadır.

Əmlaklarla bağlı sənədlərə baxış zamanı R.Məmmədov Bakı Oksford Məktəbinin 50 faizlik hissəsinin adını çəkmək istəmədiyi başqa şəxsə aid olduğunu deyib.

Sfera.az-ın araşdırması nəticəsində isə müəyyənləşib ki, R.Məmmədovun adını çəkmək istəmədiyi digər ortaqlar Ramiz Mehdiyev və onun ailə üzvləridir. Mehdiyevlər Bakı Oksford Məktəbində milyonlarla manat dəyərində böyük paya sahib olub. Mehdiyev ailəsinə payı R.Məmmədov satıb.

Qeyd edək ki, Bakı Oksford Məktəbi Azərbaycanda fəaliyyət göstərən bahalı özəl orta ümumitəhsil məktəblərindən biridir. Burada illik təhsil haqqı 15-20 min manat məbləğindədir.

Məhkəmə baxışı zamanı R.Məmmədov Nəsimi rayonu, "Təzə bazar"ın yaxınlığında yerləşən iki evdən birini Xalq artisti Aygün Kazımovadan aldığını deyib:

"Evi Aygün Kazımovadan 2009-cu ildə almışam. Həmin binada nazirdən tutmuş müğənniyə qədər yaşayanlar var idi".

Poses noyabrın 21-də davam etdiriləcək.

Orxan