2023-ci ildən Azərbaycanda ehtiyac meyarının məbləği yaşayış minimumunun məbləği ilə eyni olacaq. 

Sfera.az bildirir ki, Milli Məclis gələn il üçün  “Ehtiyac meyarının həddi haqqında” və “Yaşayış minimumu haqqında” qanun layihələrini birinci oxunuşdan sonra qəbul edib. Həmin qanun layihələrinə əsasən, ehtiyac meyarının və yaşayış minimunun məbləği 246 manat olacaq. 

Hazırda yaşayış minimumu 205 manat, ehtiyac meyarı 200 manatdır. Bu il ehtiyac meyarının məbləği 170 manatdan 200 manata, yaşayış minimumunun məbləği isə 196 manatdan 205 manata qaldırılmışdı. 

Gələn il üçün ehtiyac meyarı 46 manat və ya 23 faiz, yaşayış minimumu 41 manat, yaxud 20 faiz artırılacaq. 

Ehtiyac meyarının yaşayış minimumuna nisbətən daha böyük nisbətdə artırılmasında əsas məqsəd 2 göstərici arasında olan fərqin aradan qaldırılmasıdır. 

Qeyd edək ki, ehtiyac meyarı bir göstərici kimi ünvanlı dövlət sosial yardımının təyin edilməsi zamanı istifadə olunur. Qaydalara əsasən, ailənin adambaşına düşən gəliri ehtiyac meyarından az olarsa, həmin ailə aztəminatlı hesab edilir və ona ehtiyac meyarından az olan məbləğ qədər ünvanlı dövlət sosial yardımı təyin edilir.

Məsələn, gələn il 4 nəfərlik ailənin aylıq gəliri 700 manat olarsa, həmin ailə 284 manat ünvanlı sosial yardım ala biləcək. Çünki ehtiyac meyarının həddi 4 nəfərlik ailə üzrə 984 manat təşkil edəcək. 

“Ünvanlı dövlət sosial yardımı haqqında” Qanunda qeyd edilir ki, ünvanlı yardım gələcəkdə yaşayış minimumu əsasında müəyyənləşdiriləcək. Bunun üçün tədricən ehtiyac meyarının məbləği artırılaraq yaşayış minimumunun məbləğinə çatdırılacaq.

 
2006-cı ildən ünvanlı dövlət sosial yardımı verilir. Həmin ildə ehtiyac meyarının məbləği 30 manat, yaşayış minimumunun məbləği 58 manat müəyyən edilmişdi. Hər il ehtiyac meyarının həddinin artırılmasına baxmayaraq, ehtiyac meyarını yaşayış minimumuna çatdırmaq mümkün olmayıb və “Ünvanlı dövlət sosial yardımı haqqında” qanundakı tələb yerinə yetirilməyib. Qanunda da qeyd edildiyi kimi insanların minimum ehtiyacları yaşayış minimumu əsasında müəyyənləşdirilir və ünvanlı yardım da buna uyğun təyin edilməlidir. 

2022-ci ildə ehtiyac meyarının 30 manat artırılması uyğunsuzluğu xeyli dərəcədə aradan qaldırdı. Gələn ildən isə hər iki göstərici üzrə məbləğ eyniləşdiyindən ünvanlı yardım artıq ehtiyac meyarı ilə deyil, yaşayış minimumu ilə təyin ediləcək. 

Vasif